MENU
klinika

Zëdhënësi i Metës i përgjigjet me disa pyetje Ballës

“Ke kohë deri në 2 mars të marrësh kthesën e radhës”

21.02.2020 - 12:46

Zëdhënësi i Presidentit Ilir Meta, Tedi Blushi, i është përgjigjur kreut të Grupit Parlamentar të PS, Taulant Balla, i cili tha se Meta po tenton të pengojë integrimin e Shqipërisë me tubimin e thirrur më 2 mars.

Me ironi, Blushi shkruan në “Facebook” se Balla ka harruar që ka festuar tre herë çeljen e negociatave deri më tani, dhe se ngritja e Gjykatës Kushtetuese është kyç për çeljen e tyre.

Ndër të tjera, zëdhënësi i Metës i drejton Ballës disa pyetje, ndërsa i thotë se “ke kohë deri në 2 mars të marrësh kthesën e radhës, siç e merr gjithmonë”.

Reagimi i Tedi Blushit:

Lum Shqipëria për Tao Taon se ky vetëm për hapjen e negociatave punon. Ka harruar që e ka festuar tre herë çeljen e negociatave deri tani. Ka harruar që ngritja e Gjykatës Kushtetuese është kyç për çeljen e tyre.

Po ligjin anti-kushtetues Dvorani pse e miratuat pa pritur Venecian? S’ka nevojë, thotë Tao Tao, sepse pamë disa sugjerime që Venecia u ka dhënë disa vendeve të tjera që kanë Kushtetutë tjetër nga e jona, dhe s’mund të ndalonim ta bënim fakt të kryer ligjin mafioz të rrëmbimit të Gjykatës Kushtetuese. Po me ish-ambasadorin e nderuar Cutillio që ju lutët të dilte në TV e të vinte në diskutim dekretin e Presidentit si do ia bëni?

Apo s’ka problem se ai iku e s’merr vesh që ju e pretë në besë. Po me ambasadën e SHBA si do ia bëni, se edhe ajo bëri goxha deklaratë për të thirrur Venecian? Se ju si proamerikanë të paparë s’lëvizni asnjë presje pa u konsultuar me ta?

Duan të sabotojne ndihmat (borxhet) thotë Tao. Vetëm një PPP e tyre shkon 1 miliardë euro. Edhe 20 miliardë euro borxhe të japë bota, duke rrëmbyer Gjykatën Kushtetuese në mënyrë mafioze nga kjo bandë, asgjë nuk do shkojë në xhepat e shqiptarëve, por në xhepat e tyre dhe të disa kreditorëve.

Ah po, shqiptarët do fitojnë si gjithmonë shumëfishimin e taksave. Fakte të reja do dalin Tao, dhe ti ke kohë deri në 2 mars të marrësh kthesën e radhës, siç e merr gjithmonë.

VAZHDO TË LEXOSH MË TEPËR PËR TEMËN


"Ka harruar se halli personal nuk mund të…"

Balla i përgjigjet Metës për ‘2 marsin’: Histori idioteske!