Situata e krijuar nga pandemia e koronavirus ka vënë në lëvizje drejtuesit e Formula 1 që pavarësisht se duhej të fillonte në mesin e marsit nuk e ka zhvilluar ende garën e saj të parë. Deri më tani 8 gara janë ndërprerë, teksa në dyshim është edhe Çmimi i Madh i Britanisë.
Edhe pse në kalendar ky cirkuit duhej të mbahej në korrik, gjasat janë që të mos zhvillohet. Moment që nuk tremb thuajse aspak inxhinierin dhe drejtorin e skuderisë së Ferrarit, Matia Binotto, i cili zbulon se ekipet janë gati të zbresin në pistë edhe gjatë muajit janar.
“Ne jemi në kontakt të vazhdueshëm me drejtuesit dhe po vlerësojmë ide të ndryshme. Një ide është që të zhvillohen 2 ose 3 gara në janar, duke anuluar provat e së premtes”- shprehet Binotto.
Kjo do të sillte një tejzgjatje të sezonit të Formula 1. Gara e fundit e këtij sezoni ishte planifikuar të ishte ajo e Abu Dabit më 29 nëntor, por anulimi i disa prej Çmimeve të Mëdha mund të detyrojë organizatorët që të shtyjnë sezonin deri në janar.
Për të qenë një kampionat botëror i vlefshëm, rregullorja e Formula 1 thotë se duhet të mbahen të paktën 8 gara. Nga 22 në total, deri më tani, kanë mbetur në lojë edhe 14 gara. Numrat sa vijnë e zvogëlohen dhe gjasat janë që ky edicion i Formula 1 të vihet seriozisht në pikëpyetje.
VAZHDO TË LEXOSH MË TEPËR PËR TEMËN
Formula 1 me plan të ri për garat e këtij sezoni
