Botuesi dhe pronari i UET-së, Henri Çili ka mohuar akuzat para gjykatës së Përmetit ku mesditën e sotme u fut me pranga në duar pas arrestimit për gjashtë akuza.
Burimet tregojnë se Çili është shprehur para gjyqtarit Dritan Hasani, duke thënë “Arrestimi im është pa prova“.
Botuesi Henri Çili është mbrojtur nga avokati Andi Duraj. Mbrojtja e Çilit në gjykatë ka zgjatur vetëm 35 minuta.
Henri Çili u arrestua gjatë një operacioni policor me 6 akuza. Burimet kanë bërë të ditur se ai dyshohet të ketë premtuar se do të ndikonte në Gjykatën e Lartë për të liruar dy vëllezërit Arbion dhe Alban Aliko, të dënuar si pjesë e grupit të zjarrit që vranë efektivin e RENEA-s, Ibrahim Basha, në operacionin e qershorit të vitit 2015 në Lazarat.
Ai akuzohet për “Fshehje e të ardhurave”, “ Pastrimi i produkteve të veprës penale ose veprimtarisë kriminale”, “Falsifikimi i dokumenteve”, “Mashtrimit”, “Ushtrimi i ndikimit të paligjshëm ndaj personave qe ushtrojnë funksione publike” dhe “Falsifikimi dokumenteve” në bashkëpunim.
