Kjo është dita e pestë që në Fier nuk shënohen raste të reja me koronavirus. Edhe në 19 tamponët që janë marrë në Fier kanë rezultuar negativë. Prej zbulimit të rasteve të reja dhe fillimit të karantinës Fieri renditet i katërti në vend për numrin e të prekurve duke regjistruar 32 të infektuar ndërsa në rang qarku në 38.
Prefekti i Qarkut Fier, Baki Bala në një deklaratë për mediat është shprehur se brenda këtyre 5 ditëve është arritur të kufizohet numri i të prekurve pasi janë zbatuar masat e distancimit social ku një punë të mirë ka bërë Policia e Shtetit si dhe dezinfektimet përditë nga bashkia Fier, si dhe mbajtjen ne kontroll të zonave të nxehta në katër lagje të qytetit dhe në banesat e të prekurve.
Ndërkohë prefekti i qarkut Fier është shprehur se krahas kësaj detyre prioritare vijon puna në zbatim të masave të përcaktuara nga qeveria shqiptare dhe sidomos në goditjen e krimit dhe të kultivimit të bimëve narkotike.
