Kjo është historia e komunitetit të shqiptarëve arbëreshë në Itali. Janë lidhjet e forta me origjinën, traditat e kulturën, që, për gati 6 shekuj i mban të bashkuar me njëri-tjetrin. Çaste nga përditshmëria e tyre, në disa qyteze të vogla në jug të Italisë, vijnë e rrëfehen në një film me metrazh të gjatë, titulluar “Arbëria”./Konica.al
Filmi është shfaqur në Kalabri edhe është pritur mjaft mirë, nga publiku. Tashmë, shumë i kërkuar, “Arbëria” vjen edhe online në ‘Vimeo’, për të gjithë ata që duan ta shohin ose ta rishohin.
Të izoluar për t’u mbrojtur, mënyra më e mirë është të kalosh kohën duke parë një film të tillë, ku përshfaqen tinguj e ngjyra të një prej kulturave më të pasura dhe më të bukura në botë.
“Arbëria” është realizim i skenaristes dhe regjisores me origjinë kalabreze, Francesca Olivieri, e cila jeton në Francë. Filmi është prodhim i shtëpisë kinematografike “Open Fields Production”, në bashkëpunim “Lucana Film Commision”, “Calabria Film Commision”, ministria italiane e Kulturës dhe Enti Publik i shoqatës së autorëve dhe botuesve italianë.
… Është historia e Aidës, një stiliste e suksesshme, e cila jeton prej vitesh në një qytet metropolitan evropian. Aida, me origjinë arbëreshe, lindur dhe rritur në qytezën e vogël, Shën Katerina Arbëreshe, e pozicionuar mes Kalabrisë dhe rajonit të Basilikatës, pas vdekjes së babait të saj rikthehet në vendlindje.
Në një takim brezash ekskluzivisht femëror (nga e mbesa, tashmë adoleshente, të cilën e kishte lënë të sapolindur e deri tek halla e moshuar), Aida zbulon vetëdijen e përkatësisë së saj arbëreshe, krenarinë e harruar e përmes një udhëtimi në vendet e kujtimeve fëminore, gjen gjuhën, traditat e atmosferën e madhështisë së kulturës arbëreshe.
Roli i Aidës, interpretohet nga artistja nga Roma, me origjinë kalabreze, Caterina Misasi, e njohur në interpretimin e disa filmave, si: “100 vitrinat”, “Një mjek në familje”, etj.
Në kastin e aktorëve, merr pjesë dhe aktorja me origjinë shqiptare, Brixhilda Shqalsi, këngëtarja e njohur arbëreshe, Anna Stratigo etj.
VAZHDO TË LEXOSH MË TEPËR PËR TEMËN
Regjisorja kalabreze rigjen rrënjët
Edhe protagonistja e braktisi Shqipërinë
‘Skënderbeu’, historia më madhështore e treguar!
