Thomas Strakosha rinovon deri në vitin 2025 me klubin e Lazios. Flitej prej ditësh se akordi ishte arritur, por tashmë vetë klubi bardhekaltër e ka bërë të ditur në kanalin e vet. Potieri shqiptar i ka bindur të gjithë dhe tashmë mund të thuhet pa hezitim se se është një nga më të mirët e Serisë A.
Ai është shndërruar në një siguri për Lazion dhe prandaj tashmë edhe klubi ka rinovuar për 5 vjet të tjera. Bisedimet për rinovimin e kontratës kishin nisur prej kohësh, por konfirmimi erdhi ditën e sotme. Kontrata aktuale e Strakoshës përfundonte në vitin 2022 dhe përfitonte rreth 1.2 milionë euro në sezon.
Pas pretendimeve të gardianit, drejtori sportiv Igli Tare dhe presidenti Claudio Lotito kanë vendosur ta plotësojnë dëshirën e Strakoshës dhe t’i rrisin përfitimet e portierit. Strakosha tani do të përfitojë 2 milionë euro neto në sezon. Kjo shifër mund të tejkalohet me bonuset që pritet të përfshihen në kontratë.
Lëvizja e shpejtë e Lazios vjen pasi disa klube gjigante të Europës kanë hedhur kanditaturën për të blerë portierin e kombëtares kuqezi, ku Everton dhe Tottenham i kanë vënë syrin gardianit të Kombëtares shqiptare.