Bashkia e Fierit po vijon me intensitet ndërhyrjet për rehabilitimin e kanaleve kulluese, duke garantuar kështu mbrojtjen e tokave bujqësore.
Aktualisht, po ndërhyhet në një nga objektet e shumta të skemës së kullimit dhe ujitjes në fshatin Qarr, ku ka nisur prej ditësh rehabilitimi i plotë i gjithë sistemit të ujitjes.
Ky objekt është vetëm 1.7 km dhe do të garantojë kullimin e mbi 10 ha sipërfaqe tokë bujqësore, pa llogaritur kilometra të tërë të rehabilituar deri më sot në sistemin e gjithë bashkisë Fier.
Sipas kryetarit të bashkisë së Fierit, Armando Subashi këto investime synojnë të garantojnë një sistem efikas kullimi e ujitje.
“Në Qarr duke vijuar punën për rehabilitimin e sistemit ujitës. Dje dhjetëra hektarë toka djerr, sot shumë pranë riaktivizimit të plotë të tyre”, tha Subashi.
