Pas 4 muajsh, qytetarët do të mund të shkojnë në destinacionet e tyre me autobus. Nga dita e sotme, transporti publik ka rifilluar punën pas arritjes së marrëveshjes me Bashkinë e Tiranës për të marrë një pagë të dytë lufte prej 40 mijë lekësh dhe ndryshimi i protokollit, dy kërkesat e tyre të panegociueshme, për të cilat kanë zhvilluar disa protesta.
Që do të thotë, fatorinot dhe shoferët nuk do të mbajnë përgjegjësi në rast se në autobus do të ketë qytetarë pa maskë, por përgjegjësia do të jetë individuale.
Megjithatë, nga një vëzhgim i kryer me sy të lirë mëngjesin e kësaj të hëne në kryeqytet, në stacionet e autobusëve janë parë shumë pak persona, e ndërsa e njëjta gjë ka ndodhur edhe me autobusët, të cilët kanë pasur shumë pak pasagjerë. Kjo ndoshta nga kujdesi ndaj COVID-19, ndoshta edhe për faktin që nuk janë mësuar ende me idenë që autobusët kanë rinisur punë apo janë mësuar që të lëvizin në këmbë. Kohët kur stacionet ishin plot, dhe në autobus qytetarët rrinin ngjitur me njëri-tjetrin duken të largëta.
Ndërkohë, gjatë muajit korrik qytetarët do të duhet të paguajnë biletën, pasi nuk do të ketë abone. Aboneja e muajit mars, e cila pothuajse nuk u përdor fare pasi transporti publik u mbyll që në javën e parë, nuk është e vlefshme. Shpërndarja e saj do të nis për muajin gusht. E rëndësishme është të theksohet se pavarësisht temperaturave të larta, kondicioneri nuk do të ndizet. Ajrimi duhet të jetë i vazhdueshëm përmes dritareve.
Protokolli i sigurisë që do të zbatohet
1.Çdo përdorues i transportit publik qytetas/rrethqytetas është i detyruar të përdorë maska gjatë udhëtimit me autobus, si dhe këshillohen të mbajnë një distancë sigurie.
2.Në stacionet e qëndrimit udhëtarët janë të detyruar të përdorin maska gjatë pritjes së autobusit ndërsa personeli i transportit publik qytetas/rrethqytetas (shoferë, faturino, kontrollorë) do të jenë të detyruar të përdorin maska.
3.Për të maksimalizuar sigurinë ndaj COVID-19, edhe punonjësit e shërbimit të operatorëve si: kontrollor, dispecer, si dhe stafe të tjera plotësuese do të jenë të pajisur me maskë mbrojtëse në momentin që janë prezent në mjet gjatë kryerjes së shërbimit.
4.Ndërkaq, sikurse është rënë dakord mes Kryetarit të Bashkisë Erion Veliaj dhe Shoqatës së Shoqërive të Transportit Publik, mjetet e operimit do të dezinfektohen në mënyrë periodike në ambientet e operatorit transportues nga stafi i tij dhe mjetet e operimit në transportin qytetës/rrethqytetas për personelin e shërbimit (shoferë, faturino, kontrollorë) do të pajisen me dizinfektantë me bazë alkooli.|
5.Gjatë udhëtimit duhet të bëhet e mundur ajrimi i ambienteve të brendshme të mjetit, përgjatë gjithë kohës së udhëtimit, nëpërmjet sistemeve të ajrimit të vendosura në pjesën e sipërme të mjetit ose duke mbajtur hapur pjesët strukturore të dritareve që e kanë këtë mundësi në rastet kur mjeti është i pajisur me dritare ose me sisteme ajrimi.
6.Në çdo mjet do të vendosen postera për respektimin e rregullave të higjienës, të rekomanduara nga OBSH-ja, të vendosura në vende të dukshme për udhëtarët.
7.Për zbatimin me rigorozitet të masave të sigurisë, çdo udhëtar dhe punonjës i transportit publik mban përgjegjësi personale për mosrespektimin e këtij protokolli, si dhe janë objekt kontrolli nga organet kompetente dhe masat e parashikuara në protokollin e sigurisë do të kontrollohen nga organet kompetente.
