MENU
klinika

Kategoria Superiore, Java 32

Kukësi thyen Tiranën dhe hap titullin, ndalet Partizani

06.07.2020 - 18:46

Mendohej se Tirana mund të shpallej kampion sot, por ka ndodhur e kundërta. Kukësi fiton 2-1 në “Selman Stërmasi” dhe rihap garën për titull, pasi diferenca shkon në 6 pikë, kur mbeten edhe 4 ndeshje, me bardheblutë që kanë derbin para. Partizani është ndalur 1-1 në Ballsh nga Bylis.

Tirana ka pretenduar për një penallti në pjesën e parë, por nuk është vlerësuar si e tillë për gjyqtarët, përfshi edhe atë prapa porte që ishte 2 metër larg. Bardheblutë nuk goditën asnjëherë portën në këtë fraksion, ndërsa Kukësi ishte më i rrezikshëm me dy raste të pastra.

Loja e mirë e Kukësit vijon edhe në pjesën e dytë, që kurorëzohet me gol nga Cooper në minutën e 58-të. Tirana nuk arrin të organizohet. Për të ardhur në minutën e 84-t, kur miqtë ndëshkojnë sërish, kësaj here me Et’hemin, që lëshon një parabolë të pakapshme.

Tirana hidhet e tëra në sulm, por goli vjen shumë vonë, në minutën e katërt shtesë me Ngoo. Përfundon 1-2, me Kukësin që mund të besojë verbërisht, natyrisht duke bërë tifo për Partizanin në derbi.

Në ndeshjen tjetër në Ballsh, Ndreca shënoi golin e parë në 18’ nga një goditje dënimi. Portieri Hoxha arrin ta largojë vetëm kur kishte kaluar vijën fatale. Të kuqtë vetëm në fundin e pjesës së parë zgjohen, por Cinari humb një mundësi të artë.

Partizani rriti ndjeshëm lojën në pjesën e dytë, por goli do të vinte vetëm në minutën e 71-të. Trashi kroson bukur në zonë dhe Brown nuk fal. Partizani pati 3 raste të mira më pas për të përmbysur rezultatin, por nuk ia doli. Në fund Bylis mbetet me 10 lojtarë. Një pikë që vlen pak për të dy ekipet.

VAZHDO TË LEXOSH MË TEPËR PËR TEMËN