U mendua që pas sigurimit të pozicionit të “play-out” në ndeshjen e fundit Werder Bremen do ta kishte të lehtë qëndrimin në Bundesliga, por të paktën në ndeshjen e parë shtesë, rreziku i rënies është konstant. Kjo pasi në fushën e vet Bremen barazoi 0-0 me Heidenheim, skuadër që siguroi vendin e tretë në Bundesliga 2.
Milot Rashica është aktivizuar për 90 minuta të plota. Një paraqitje e mirë e mesfushorit të Kosovës, që pritet këtë verë të kalojë te Leipzig ose më e mira e mundshme te Dortmund, por ka zëra edhe për në Serie A, ku Milan duket më i interesuari.
Në fund Bremen rrezikoi shumë, pasi në minutën e 87-të mbeti me 10 lojtarë, kur Moisander merr kartonin e dytë të verdhë. Ndeshja e kthimit do të luhet më 6 korrik. Një sfidë totalisht e hapur dhe mjaft interesante.