Takimi i parë, mes Helenës dhe Ismailit, do të ishte në Tiranë, pasi ky i fundit ishte kthyer nga studimet në Moskë. Menjëherë, Ismail Kadaresë i pëlqeu kaq shumë Helena, saqë nxori një brisk nga xhepi, i preu pak nga flokët bionde, i futi ne xhep dhe iku pa i folur…
Bashkëshorte, nënë dhe grua gjithmonë aktive me krijimtarinë letrare, apo pjesëmarrjen e vazhdueshme në aktivitetet me natyrë letrare dhe atyre për të drejtat e gruas në shoqëri, sidomos në shoqërinë e një vendi të vogël si yni. Helena, dikur vajza që i rrëmbeu zemrën një shkrimtari të ri “tekanjoz”, që premtonte shumë, feston sot ditëlindjen, si udhëtare jete e gjeniut të letrave shqipe! /Konica.al
Kryeministri Rama, nuk ka vonuar ta urojë zonjën Kadare… Për të, Helena nuk hyn te gratë e zakonshme; ajo është një grua e jashtëzakonshme shqiptare.
Rama thotë, se Helena është gjysma më e mirë e çiftit Kadare, ajo që përfaqëson engjëllin, kurse Ismaili djallin.
Urimi i Kryeministrit:
#EDHE100
HELENA KADARE më kujton gjithnjë atë shprehjen e famshme, një burrë peshohet nga gruaja dhe biblioteka! E mbase gabohem, po pa Helenën biblioteka nuk do të kishte mjaftuar për t’ia mundësuar Ismailit fortesën e blinduar, mu në zemër të tiranisë komuniste, ku morën jetë krijesat e tij të hatashme, që çanë rrethimin tiranik e u ngjitën në majat e letërsisë së botës mbarë.
Më kujtohet vite e vite më parë, kur në netët e vona në bulevardin e zbrazët të Tiranës, Ismaili ecte me hijen e vet vezulluese në krah, Helenën, e cila ja ashtu njësoj si në shëtitjen e mbrëmjes, përmes boshllëkut që rrethonte qenien e tyre të dyfishtë, e ka shoqëruar Ismailin me vezullimin e përkushtimit të saj, pa e lënë kurrë një ditë të vetme vetëm, qysh nga dita e parë e njehsimit të tyre.
Është pak të thuash se Ismaili nuk hyn tek njerëzit e kollajshëm dhe pak është të thuash se Helena nuk hyn tek gratë e zakonshme. E bukur, e mençur, e lexuar, e dalë dhe e admiruar nga larg e nga afër, prej të panjohurve e të njohurve, po njëkohësisht e përulur ndaj fatit që e lidhi përmes një dashurie të zjarrtë me një xhind të fjalës së shkruar, që buzëqeshjet i ka si të dielat në kalendarin e vitit, Helena është një grua e jashtëzakonshme shqiptare.
Shtyllë e fortesës ku xhindi rrotullohet prej 57 vjetësh me daullet e shiut të tij, vatër që ngroh hapësirën ku ngrijnë e shkrijnë prurjet e botës së tij fshehtë, dritë që rri gjithnjë ndezur për t’u kujdesur që ai ta gjejë gjithnjë atë çka i duhet kur i duhet të kthehet nga arratitë në skutat e mendjes, portë që hapet bukur për të mikpritur vizitorë dhe sy që ndjek gjithçka, njësoj siç prej një jete ka ndjekur e sistemuar për botim në makinën daktilografike, çdo rresht të dorëshkrimeve të të shoqit, Helena është për Ismailin një dhuratë po aq bujare e Zotit sa edhe gjenialiteti i tij krijues.
Nëse si rregull gruaja është gjysma më e mirë e burrit, Helena është në atë çift të pandarë e të pandashëm engjëlli, që si edhe djalli jetojnë brenda tek i gjalli, e nëse historia do të flasë nesër vetëm për Ismailin, jeta e tij nga dje, sot e deri atëherë mes fantazisë e realitetit, nuk mund të kuptohet asfare pa Helenën.
Duke ia uruar ditëlindjen zonjës së rrallë, uroj që shëndeti, dashuria e gëzimet të mos i mungojnë kurrë, siç kurrë nuk i ka munguar vezullimi qenies së saj fisnike e të urtë.
#TëRRALLË
VAZHDO TË LEXOSH MË TEPËR PËR TEMËN
“E dashur Elona”, Helena Kadare i shkruan të bijës së Sadijes
Helena Kadare: Gratë shqiptare, më të përkushtuarat që kam parë
Helena Kadare: Si u njohën Dritëroi dhe Sadija në dasmë
