MENU
klinika

Çfarë i shqetëson eurodeputetët?

Serbia si “kërcënim” për BE

28.09.2020 - 16:15

Në Parlamentin Europian është ngritur shqetësimi se anëtarësimi i Serbisë mund të minojë sigurinë e vetë Bashkimit Europian, duke pasur parasysh lidhjet e forta të Beogradit me Moskën.

Eurodeputeti suedez i grupit të Konservatorëve dhe Reformistëve, Charlie Weimers thotë se Serbia nuk po përafron qëndrimet në politikën e saj të jashtme me qëndrimet e BE-së, që është edhe një kusht për anëtarësim.

Weimers kujton votën kundër dënimit të pushtimit të Krimesë nga ana e Rusisë dhe deklaratën e Presidentit serb, Aleksandër Vuçiç në qershor të këtij viti, që tha se çdo produkt i mundshëm nga bisedimet mes Serbisë dhe Kosovës duhet të miratohet edhe nga Moska. Vuçiç refuzoi gjithashtu çdo mundësi që Beogradi të pranojë anëtarësimin në këmbim të njohjes së Kosovës.

Në dritën e këtyre qëndrimeve dhe deklaratave, eurodeputeti suedez i kërkon Komisionit që të rivlerësojë qëndrimin në lidhje me ndikimin që mund të kenë në fushën e sigurisë anëtarësimi i Serbisë.

Megjithatë, Komisioni mendon se Serbia ka një rrugë të qartë europiane dhe anëtarësimin e ka prioritet strategjik, që prej marrjes së statusit të vendit kandidat në vitin 2012 dhe hapjen e negociatave në 2014.

Gjithsesi, Komisioni paralajmëron se rruga e Serbisë drejt anëtarësimit të plotë rrezikon të minohet nëse ajo nuk u përmbahet zotimeve që burojnë nga kjo sipërmarrje, mes të cilave edhe qasja dhe përputhja e plotë e qëndrimeve në politikën e jashtme me Bashkimin Europian.

“Kjo kërkon që Serbia të përafrohet në mënyrë progresive me qëndrimin e përbashkët të Bashkimit Europian për Politikën e Jashtme dhe Sigurinë. Komisioni i vëzhgon imtësisht këto çështje dhe i raporton ato çdo vite para Parlamentit dhe Këshillit”, thotë Komisioneri për Zgjerimin, Oliver Varhelyi.

Komisioni thotë gjithashtu se pret që Serbia të vazhdojë dialogun me Kosovën, që në fund duhet të ketë një marrëveshje të detyrueshme ligjore që do të përkthehet në normalizim të marrëdhënieve.(SI)

VAZHDO TË LEXOSH MË TEPËR PËR TEMËN


Media e Beogradit me gjuhë të fortë nacionaliste

“Serbia, do të përpijë Kosovën dhe Shqipërinë!”


"Politika s’duhet të përzihet në drejtësi"

Haradinaj i del kundër Hotit për shuarjen e Taskë Forcës

"Në të kundërt vendi shkon në zgjedhje"

Haradinaj kërkon postin e presidentit, ultimatum LDK

"Rrjetet 5 G do të kenë ndikim të madh pozitiv për ekonomitë..."

M. e Veriut dhe Kosova nënshkruajnë Memorandumin e 5G