Nga sot një nga kopshtet publike me numrin më të madh ndër 26 kopshtet e bashkisë së Peqinit do të qëndrojë i mbyllur pasi deri tani të paktën 6 edukatore kanë rezultuar me COVID-19 pozitiv. Burime zyrtare konfirmuan se bëhet fjalë për kopshtin “Sami Frashëri” të qytetit të Peqinit i cili frekuentohet nga rreth 100 fëmijë.
Kjo situatë ka alarmuar autoritetet përgjegjëse të cilat menjëherë kanë marrë të gjitha masat e parashikuara për përballimin e gjendjes aktuale. Rasti i parë me COVID-19 pozitiv në radhët e personelit që shërben në këtë kopsht është shfaqur që gjatë javës së kaluar.
Ndërkohë që sot bëhet me dije se edhe disa pjesëtarë të tjerë të personelit dyshohet se janë prekur nga COVID 19 pozitiv, ndërsa për 6 të tjerë rezultati u konfirmua zyrtarisht.
Kjo situatë kaq e rënduar ka bërë që i gjithë personeli që shërben në kopshtin “Sami Frashëri” të Peqinit të vetëkarantinohet, ndërsa janë dezinfektuar ambientet e brendshme dhe të jashtme të këtij kopshti.
Gjithashtu për shkak të situatës së krijuar po u bëhet testi të gjithë prindërve të fëmijëve që frekuentojnë këtë kopsht publik. Gjatë të martës në qarkun e Elbasanit sipas burimeve zyrtare ka pasur rritje në shifra shqetësuese të rasteve të prekur nga COVID-19 pozitiv.
VAZHDO TË LEXOSH MË TEPËR PËR TEMËN
