Shqipëria do të ketë një Kod të ri Penal. Një grup ekspertësh po punon për prezantimin e draftit final ndërsa detajet e para të nismës u bënë më dije nga ministrja e Drejtësisë Etilda Gjonaj dhe drejtori i shkollës së magjistraturës Arben Rakipi.
“Arnimet” ndër vite të Kodit Penal duket se nuk kanë dhënë rezultate ndaj së shpejti vendi do të ketë një kod të ri. Drafti paraprak i hartuar nga ekspertët do të diskutohet edhe me grupet e interesit ku parashikohet dekriminalizimi apo ndryshimi i disa veprave dhe shtimi i disave të tjera.
“Nisur nga rastet kur kriminaliteti goditet në qendër të tij, ne kemi bërë të detyruseshme, dënimet plotësuese që lidhen konfiskimin apo mbylljen e biznesit që vënë aktivitetit në shërbim të krimit. Kemi menduar që konfisikimi i detyrueshëm jo për t’ia lënë në dorë opurtinitetit të gjykatave. Plagosja e lehtë nga pakujdesia është një vepër e cila, është dnëuar me gjobë dhe vazhdon të qëndrojë në Kodin Penal si një prej mënyrave si vepër, ku ne mendojmë se duhet ta heqim nga trajtimi si Penale,” – u shpreh Arben Rakipi, drejtor i shkollës së Magjistraturës.
Për ministren e Drejtësisë Etilda Gjonaj, ky kod do të eliminojë boshllëqet ligjore për abuzimet që janë kryer deri më tani në vendimet e gjykatave.
“Ky draft i ri synon adresimin e problematikave serioze që vijnë si rezultat i paqartësisë dhe boshllëqeve të dispozitave ligjore, të cilat janë bërë shkak për interpretime abuzive në vendime gjyqësore. Ky Kod synon reflektimin e vendimeve të shumta të Gjykatës Kushtetuese dhe atyre unifikuese të Gjykatës së Lartë, të cilat shpesh herë kanë dhënë vendime për shfuqizimin e disa neneve të ndryshme të Kodit Penal, të cilat janë gjetur prej saj në kundërshtim me dispozitat kushtetuese,” – deklaroi ministrja Gjonaj.
Pas diskutimit me grupet e interesit gjatë muajve tetor dhe nëntor, kodi i ri penal pritet të kalojë në Kuvend për miratim në fund të vitit.
VAZHDO TË LEXOSH MË TEPËR PËR TEMËN
