Zëvendës këshilltari i Sigurisë Kombëtare të Shtëpisë së Bardhë denoncoi trajtimin që Kina po iu bën myslimanëve Ujgurë, duke thënë se nuk kishte asnjë justifikim që ky vend të mbante “kampe përqendrimi” brenda kufijve të tij.
Matt Pottinger, i cili ka qenë një figurë udhëheqëse në zhvillimin e politikës së presidentit, Donald Trump për Kinën, e bëri këtë vërejtje në Mandarin në një fjalim në internet.
“Nuk ka asnjë justifikim në filozofinë, fenë ose ligjin kinez për ndërtimin dhe përdorimin e kampeve të përqendrimit”, tha Pottinger në fjalimin e tij, i cili tha se i ishte drejtuar popullit kinez.
Ky qëndrim mbajtur nga Pottinger përfaqëson një kritikë të mëtejshme të SHBA ndaj Kinës në prag të zgjedhjeve presidenciale të SHBA-së më 3 nëntor, në të cilat Trump, një republikan, ka mbajtur haptazi një qëndrim të ashpër ndaj Kinës si një temë kryesore të politikës së jashtme.
Javën e kaluar, këshilltari i sigurimit kombëtar të SHBA-së, Robert O’Brien, tha se Kina po shkonte afër një gjenocidi ndaj myslimanëve në rajonin e saj Xinjiang.
Pottinger u bëri thirrje njerëzve në Kinë “të hulumtojnë të vërtetën në lidhje me politikën e qeverisë ndaj popullit Ujgur dhe pakicave të tjera fetare”.
Ai tha se ata duhet të pyesnin veten pse gazeta Economist i kishte quajtur veprimet e Kinës në Xinjiang “një krim kundër njerëzimit”.
Shtetet e Bashkuara kanë denoncuar trajtimin që Kina po iu bën Ujgurëve dhe myslimanëve të tjerë të pakicave në Xinjiang dhe kanë vendosur sanksione ndaj zyrtarëve që fajësojnë për abuzime.
Megjithatë, deri tani veprimet e Pekinit nuk janë cilësuar gjenocid ose krime kundër njerëzimit, emërtime që do të kishin implikime të rëndësishme ligjore dhe do të kërkonin veprime më të forta kundër Kinës.
Kombet e Bashkuara pohojnë se më shumë se një milion myslimanë janë arrestuar në Xinjiang dhe aktivistët thonë se atje po ndodhin krime kundër njerëzimit dhe gjenocid.
Kina ka mohuar çdo abuzim dhe thotë se kampet e saj në rajon ofrojnë trajnim profesional dhe ndihmojnë në luftimin e ekstremizmit.
Pottinger tha se kishte një konsensus ndërkombëtar për të vijuar me një qëndrim më të ashpër ndaj Pekinit.
Pottinger foli pasi Presidenti i Kinës Xi Jinping mbajti një fjalim në 70-vjetorin e hyrjes së trupave kineze në luftën koreane për të luftuar kundër trupave amerikane, në të cilën paralajmëroi se Kina nuk do të lejojë kurrë sovranitetin, sigurinë dhe interesat e saj të zhvillimit të minohen.
Xi nuk iu referua drejtpërdrejtë Shteteve të Bashkuara me të cilat marrëdhëniet janë zhytur në nivelin më të ulët në dekada për mosmarrëveshjet që variojnë nga tregtia dhe teknologjia te të drejtat e njeriut dhe koronavirusi.
Përkthyer dhe përshtatur nga: usnews/ F.H, konica.al
VAZHDO TË LEXOSH MË TEPËR PËR TEMËN
SHBA zemëron Kinën/ Dërgon luftanije në Ngushticën e Tajvanit
