Lewis Hamilton dhe Mercedes tashmë kanë mbyllur gjithçka sa u përket titujve për pilotë dhe konstruktorë. Kur mbeten edhe 3 gara në Formula 1, çfarë objektivash kanë pilotët dhe skuderitë e tjera? Ferrari duhet të konfirmojë progresin e treguar në Stamboll në mënyrë që të ndjekë vendin e tretë për konstruktorë.
Kur mbeten edhe 3 gara nga fundi, kokëkuqja ndodhet në vendin e gjashtë me 130 pikë. Në vendin e tretë ndodhet Racing Point me 154 pikë, në të katërtin McLaren me 149 pikë dhe në të pestin Renault me 136 pikë.
Pra, vetëm 24 pikë e ndajnë Ferrarin nga vendi i tretë. Dhe Vettel e Leclerc këtë do të bëjnë, të marrin sa më shumë pikë, në mënyrë që të rregullojnë sadopak imazhin e Ferrarit në fundin e këtij sezoni të dobët.
Po pilotët vetë çfarë objektivash kanë? Çdo garë vlen shumë. Edhe Hamilton, pavarësisht se ka fituar titullin, sërish do të kërkojë të triumfojë. Por gara e vërtetë duket se është për vendin e dytë dhe të katërt.
Max Verstappen me Red Bull Honda synon për vendin e dytë, që mbahet nga Valtteri Bottas. Njëzet e shtatë pikë ndajnë Verstappen nga Bottas në klasifikimin e përgjithshëm. Do të jetë shumë e vështirë, pasi holandezi ka treguar se jep gjithçka në pistë për të fituar.
Në vendin e katërt është Sergio Perez me 100 pikë, ndjekur nga Leclerc me 97 dhe Ricciardo me 96 pikë. Totalisht e hapur gara për vendin e katërt. Do të garohet dy herë në Bahrein radhazi duke nisur nga kjo fundjavë dhe mbyllet më 13 dhjetor në Abu Dhabi të Emirateve të Bashkuara Arabe.