Të gjitha ikonat dhe veprat e artit me karakter kishtar, prej kohësh janë në procese restauruese dhe rikthimi në identitet. Nën kujdesin e minstrisë së Kulturës, një pjesë e konsiderueshme e tyre tanimë gëzojnë ngjyrat e vërteta, që koha i kishte zbehur.
Pranë laboratorit të restaurimeve në Muzeun Kombëtar të Artit Mesjetar të Korçës, kryhen proceset e rimëkëmbjes për veprat që paraqesin problemet e mësipërme. Ministrja e Kulturës, shprehet se puna vijon çdo ditë për shumë vepra arti, duke nxjerrë në dritë vlerat e tyre.
“Çdo ditë, në laborator shpëtohen prej degradimit vepra të trashëgimisë tonë ikonografike, duke nxjerrë në dritë vlera të jashtëzakonshme.”
Ekspozita “Restaurime” sjell në vëmendjen e publikut këto operacione delikate, që i rikthejnë shkëlqimin e venitur nga koha.
Ikona e “Shën Minait”, e mesjetës së hershme, prejardhur nga kisha e “Shën Mërisë”, në Ogren të Përmetit është shembulli më i mirë i punës plot durim e pasion të specialistëve të Muzeut Kombëtar Mesjetar, në Korçë”, – shprehet Margariti në një status në “Facebook”, ndërsa ka publikuar dhe ikonën.
Muzeu Kombëtar i Artit Mesjetar, në Korçë u përurua më 24 prill 1980, sui një nga qendrat muzeore më të rëndësishme të Shqipërisë e më gjerë.
Fondi i muzeut numëron mbi 7 mijë objekte kulti dhe arti, kryesisht ikona e më pak punime guri, druri, metali e tekstili të krijuara nga mesjeta e hershme deri në fillim të shek. XX, nga artistë anonimë e të mirënjohur, nga treva të ndryshme të vendit.
Në sallën kryesore janë vendosur një koleksion ikonash dhe objekte nga më të mirat, krijuar në shekuj e që pasqyrojnë momente të ndryshme të zhvillimit të ikonografisë shqiptare dhe përfaqësuesit kryesorë të tyre. Aty ka vepra të autorëve anonimë të shekullit XIII-XIV dhe të tjerë të mirënjohur, si: Onufri, Onufër Qiprioti, Mësues Kostandini, Jeromonaku, Shpataraku, Selenicasi, vëllezërit Zografi etj.
Drejtimet kryesore të aktivitetit të Muzeut Kombëtar të Artit Mesjetar janë ekspozimi dhe promovimi publik, mbrojtja, konservimi dhe restaurimi i objekteve, studimi e puna shkencore dhe aktiviteti ndërkombëtar. I ndërtuar në vitin 1980 dhe rindërtuar në 2016-ën, ai shtrihet përgjatë bulevardit “Fan Noli”.
E vjetra dhe risia, bashkëjetojnë natyrshëm mes një harmonie ngjyrash e nuancash.
VAZHDO TË LEXOSH MË TEPËR PËR TEMËN
Ben Apolloni shfaq ‘Dashuritë e virgjëreshës Madalenë’
Barleti epos i shpirtit shqiptar
