Agjencia Europiane e Medikamteve (EMA) dhe Komisioni Europian miratuan të hënën vaksinën kundër koronavirusit “BioNTech-Pfizer”. “Kjo do të thotë që vaksinimi masiv i rreth 450 milionë njerëzve në të gjithë BE-në është një hap më pranë. Vlerësimi pozitiv i EMA-s për vaksinën pritej gjerësisht.
Vendet e BE-së po përballen me një valë të dytë të ashpër të virusit”, shkruan Deutsche Welle. Autoriteti për miratimin e medikamenteve në BE, i vendosur në Amsterdam, ishte nën presion nga vendet europiane, përfshirë Gjermaninë, për të përshpejtuar vendimin e tij, i cili ishte planifikuar fillimisht për 29 dhjetor.
“Ne i dhamë autorizim të kushtëzuar për treg vaksinës së prodhuar nga ‘BioNTech’ dhe ‘Pfizer’”, tha në një deklaratë presidentja e Komisionit Europian, Ursula von der Leyen, vetëm disa orë pas rekomandimit të EMA-s për të miratuar vaksinën. Përveç moshës, kufizimet prekin edhe gratë shtatzëna. Meqenëse për këtë grup ka vetëm të dhëna të kufizuara, duhet të vlerësohet rast pas rasti a do të ishte e sigurt të jepet vaksina. Vaksina prodhohet nga kompania gjermane “BioNTech” dhe gjigandi farmaceutik amerikan “Pfizer” dhe në testimet klinike rezultoi efektive në masën 95 për qind. Por, sipas Deutsche Welle, transporti është ai që mund të paraqesë sfida logjistike, pasi vaksina duhet të ruhet në -70 gradë Celsius, një temperaturë shumë më e ulët se temperaturat e ftohjes standarde. Kjo e detyroi kompaninë të zhvillojë kontejnerë të veçantë për transport. Por, kur do të mbërrijë vaksina në vendin tonë?
Dhe sa do të duhet të presim, ndërkohë që një sasi e konsiderueshme dozash kanë mbërritur në Serbi dhe Maqedoninë e Veriut? Në një intervistë dhënë për DW, shefja e Shërbimit të Sëmundjeve Infektive në ISHP, Silva Bino, tha se Shqipëria është pjesëmarrëse në COVAX dhe bën pjesë në vendet me vetëfinancim të vaksinës anti-COVID si edhe është në bisedime edhe me një kompani prodhimi por pa dhënë detaje se kur do të mbërrij vaksina në vendin tonë. “Shqipëria është pjesë e COVAX me vetëfinancim. Pra, ajo ka paguar/blerë tek COVAX për të pasur vaksinën anti-COVID. Ndërkohë, ka edhe disa propozime të tjera dhe po vlerësohen marrëveshje me vende të BE-së, të cilat mund të ofrojnë një sasi vaksinash si dhe me vetë Komisionin Europian për grupe të ndryshme vunerabël.
Po ashtu, po bëhen përpjekje për marrëveshje direkte mes Shqipërisë me kompani prodhuese. Komiteti i Ekspertëve po vlerëson skenarë të ndryshëm të furnizimit me vaksina si dhe skenarë të ndryshëm të vaksinimit në vendin tonë. Një skenar është për vaksinën e prodhuar nga “PFIZER” që kërkon të ruhet në minus 80 gradë Celsius dhe për këtë lypset një investim për një infrastrukturë të re; skenari tjetër është për vaksinën anti-Corona të prodhuar nga kompania “MODERNA” që kërkon më tepër investime; skenari i tretë është për vaksinën e prodhuar nga kompania “AstraAzeka”, për të cilën Shqipëria i ka kapacitetet dhe duhen vetëm të ketë pak shtesa. Por nuk përjashtohet edhe marrja e vaksinave nga kompania “Johnson&Johnson” apo kompani të tjera”, tha doktoresha.
E pyetur nga DW se kur mendohet të fillojë vaksinimi dhe me cilat shtresa të popullsisë, Bino tha parashikohet në 3-mujorin e parë 2021. “Komiteti i Ekspertëve të Vaksinimit ka identifikuar si grupe prioritare punonjësit e shëndetësisë, rezidentët dhe punonjësit e institucioneve të kujdesit afatgjatë dhe më pas personat mbi 75 vjeç, ata mbi 65 vjeç, personat më të rinj se 65 vjeç me sëmundje bashkëshoqëruese, personelin e shërbimeve kritike”.
VAZHDO TË LEXOSH MË TEPËR PËR TEMËN
