Kryeministri Edi Rama deklaroi se nëse qeveria e tij fiton një mandat të tretë nuk do të ketë as ulje dhe as rritje taksash për biznesin e vogël dhe të madh.
Në një konferencë për mediat me temë ‘Ekonomia në fokus’, kreu i qeverisë theksoi se do të vijohet me ngritjen e hapësirave mes administratës dhe qytetarëve, që është marrëdhënia online, për të shmangur abuzimet.
“Nga një punë krahu në kuptimin ‘hidhu rrugëve dhe përdor forcën’ do të kalohet në një punë inteligjente, e bazuar tek truri inteligjent i gjithë sistemit të kompjuterizuar që do të japë të dhëna për çdo individ që bën biznes në Shqipëri. Kjo nuk është ëndërr, por është një punë që ka filluar. Sot që flasim ka filluar me marrëdhëniet biznes-qeveri. Në dy faza të tjera do të hyhet në marrëdhëniet biznes-biznes. Është themelore që të kuptohet se puna për këtë karabina është punë kolosale dhe s’ka të tjera forca që e bëjnë dot këtë punë dhe që ta çojnë këtë deri në fund. Ne kemi qenë shumë të qartë që ditën e parë dhe s’mund të na e vërë kush para syve se; kush fiton më pak paguan më pak. Nga pjesa më e goditur e atyre që vetëpunësohen dhe krijojnë punë për të tjetër, është pjesa më e privilegjuar që i bën qeveria, zero taksë për tatim-fitimin. Ia kemi rritur pjesës tjetër. Në mandatin e tre nuk ka më as rritje, as ulje. S’kemi ça ulim më për biznesin e vogël, taksën mbi fitimin dhe për biznesin e madh do të vazhdojmë që të jemi në të njëjtin pozicion dhe do t’i krijojmë hapësirë në raport me administratën duke e fiskalizuar dhe duke e kthyer marrëdhënien online.”, tha Rama.
Kryeministri Edi Rama e krahasoi formalizimin e ekonomisë dhe ngritjen e sistemeve të financave me procesin e rindërtimit. Ai tha se është hedhur karabinaja por se ende nuk janë të banueshme, duke hedhur sytë tek mandati i tretë dhe justifikuar këtë kërkesë për vijimin e punës.
Rama tha se për sa i përket llogarive të shtetit, situata ishte si pas tërmetit.
“Është një imazh që mund të ndihmojë lehtësisht për të kuptuar si e hsohim ne të sotmen krahasuar me të djeshmen dhe në raport me të ardhmen. Duke sjellë krahasimin me rindërtimin mund të thuhet se nëse sot kantieret tona të rindërtimit dhe secili le të sjellë me imagjinatën e tij parasysh Laçin apo Fushë-Krujën apo Thumanën, apo cilindo tjetër kantier, janë faktikisht një pasqyrë e një situatë ku është vendosur e gjitha infrastruktura nëntokësore, janë vendosur themelet, janë ngritur karabinatë, por faktikisht nuk është ende një situatë e banueshme, në sensin e funksionalitetin e plotë të atyre godinave për të cilat vazhdon puna që të pajisen me të gjitha sistemet e brendshme dhe përfundimisht nga kantiere të kthehen në vendbanime. Kjo është situata edhe në këtë sektor dhe çdo sektor. Por ama krahasuar me të djeshmen, është një situatë qartësisht e ndryshme dhe është një situatë ku qartësisht mund të shihet e nesërmja, ndërkohë që e djeshmja ishte si situata pas tërmetit. Si situata pas tërmetit ishte dhe situata e llogarive të shtetit, ishte dhe situata e të gjitha të dhënave në aspektin ekonomik dhe fiskal”, tha Rama.
Ai mori në analizë dhe premtimin për hapjen e 300 mijë vendeve të punës. duke iu referuar regjistrit të punës, Rama tha se janë 225 mijë punonjës më shumë se në 2013.
“Unë po e nis nga një e dhënë pasi është një këngë e përsëritur dhe natyrshëm, kuptueshëm e përsëritur për qëllime propagandistike.
Ne kemi premtuar 300 mijë vende pune dhe sot thjesht duke iu referuar shifrave, jo anketimeve, jo statistikave të nxjerra nga anketimet, por shifrave të regjistrit të punës në Republikën e Shqipërisë, hapeni dhe shikojeni, ju që jeni ndërmjetësit mes palëve në skenën politike apo në mexhelisin e debatit publik dhe qytetarëve. Thojuni njerëzve nëse është apo nuk është e vërtetë që në regjistrin e punës të Republikës së Shqipërisë në vitin 2013 kishte 473 506 vetë të regjistruar dhe në fund të 2019 kishte 698 235 punonjës të regjistruar, janë apo nuk janë 225 mijë më shumë që paguhen dhe paguajnë sipas vendit të punës së tyre”, deklaroi Rama.
Ai pyeti se çfarë duhet të zgjedhin qytetarët
“Kthimin mbrapa apo vazhdimin e kësaj pune, që do të thotë largim përfundimtar të elementit abuziv, vendosjen në një sistem tjetër ku punën e garantimit të marrëdhënies mes biznesit si prodhues të ardhurash dhe si kontributor për shtetin nuk e bën një ushtri inspektorësh por një sistem inteligjent ku fokusi është fiskalizimi. Sot ne kemi faktikisht kursyer çerek milion orë për marrëdhëniet biznes shtet në aspektin e radhëve, të pritjeve, të marrjes së përgjigjeve duke i kaluar një pjesë të madhe të komunikimeve dhe kontakteve me shtetin online. Por ama është një punë në mes. Ne dimë jo vetëm shumë mirë si vazhdon por kemi hedhur të gjitha piketat. Të gjitha sistemet e domosdoshme për ta bërë një karabina një mjedis komod, duke filluar nga energjia, interneti, nga uji, dritat e kështu me radhe janë faktikisht në rrugën e vendosjes njëra pas tjetrës. Ajo që ne do të realizojmë është që brenda 4-vjeçarit të ardhshëm gjithçka do të jetë online për biznesin. marrëdhënia biznes-qeveri, biznes-biznes dhe biznes-qytetar”, deklaroi Rama.
VAZHDO TË LEXOSH MË TEPËR PËR TEMËN
