Joseph Robinette Biden Jr. dhe Kamala Devi Harris bënë betimin dje në Kapitol.
Joseph Robinette Biden Jr u betua të Mërkurën si presidenti i 46-të i Shteteve të Bashkuara, duke marrë drejtimin e një vendi të shkatërruar nga pandemia, dhe gjithashtu me një popullsi të ndarë duke bërë thirrje që ti jepet “fund kësaj lufte” pas katër viteve të trazuara që shkatërruan popullsinë amerikane.
Biden u përpoq të kthente menjëherë rregullin në presidencën e rrëmujshme të Donald J. Trump, duke ftuar Republikanët të bashkoheshin me të në përballjen me krizat e tmerrshme ekonomike, sociale dhe shëndetësore të kombit dhe ai nisi menjëherë nga puna për të ndryshuar disa nga politikat e ndjekura nga paraardhësi i tij duke ndaluar ndërtimin e murit kufitar me Meksikën, urdhëroi heqjen e ndalimit të udhëtimit për emigrantët dhe nisi përpjekjet për bashkimin e SHBA-së përsëri në marrëveshjen e klimës së Parisit.
Transferimi tradicional i pushtetit përfundoi pas javësh situate të tensionuar ndërsa ish-presidenti Trump tentoi të përmbyste qeverinë duke nxitur një sulm në Kapitol. Me dorën e tij në një Bibël që ka qenë në familjen e tij për 128 vjet, Biden lexoi betimin e drejtuar nga Shefi i Drejtësisë John G. Roberts Jr në 11:49 të mëngjesit.
Zv.presidentja, Kamala Devi Harris u betua disa minuta para tij nga gjyqtarja Sonia Sotomayor duke përdorur një Bibël që dikur i përkiste Thurgood Marshall, ikona e të drejtave civile dhe drejtësia e Gjykatës së Lartë. Harris u bë kështu gruaja me postin më të lartë në historinë e Shteteve të Bashkuara dhe e para Amerikane me ngjyrë dhe personi i parë me origjinë nga Azia Jugore që mban postin e dytë më të lartë të vendit.
Momenti u kulmua nga peizazhi ku Biden u filmua duke bërë betimin në të njëjtin Front Perëndimor të Kapitolit të sulmuar vetëm dy javë më parë nga një turmë plaçkitëse që përpiqej të bllokonte ratifikimin përfundimtar të humbjes zgjedhore të Trump. Pa përmendur kurrë emrin e Trump, i cili u largua nga Shtëpia e Bardhë herët në mëngjes për në Florida, por që ende përballet me një gjyq në Senat për provokimin e mbështetësve të tij, Biden tha se demokracia e Shteteve të Bashkuara, ishte sulmuar nga ekstremizmi dhe gënjeshtra, por në fund të fundit mbijetoi.
“Vullneti i njerëzve është dëgjuar”, shtoi ai. “Ne përsëri e besojmë që demokracia është e çmuar. Demokracia është e brishtë. Dhe në këtë orë, miqtë e mi, demokracia ka triumfuar”.
Tashmë e dëmtuar për shkak të refuzimit të Trump për të pranuar zgjedhjet, tranzicioni që përfundoi të Mërkurën ishte si asnjë më parë. Një president i cili erdhi në Uashington për të hedhur në erë sistemin demokratik u zëvendësua nga një që është një krijesë e përjetshme e tij. Një president i cili dukej i aftë për pothuajse gjithçka në çdo moment u zëvendësua nga një president që përshtatet me konventat e politikës moderne.
Mesazhi i Biden ishte pajtues, por ende sfidues, pasi ai u bëri thirrje Amerikanëve të lënë mënjanë ndarjet e tyre të thella për t’u bashkuar për t’u përballur me pandeminë e koronavirusit, problemet ekonomike dhe racizmin.
“Ne duhet t’i japim fund kësaj lufte politike, luftës së zonave rurale kundër atyre urbane, konservatorëve kundrejt liberalëve”, tha Biden. “Ne mund ta bëjmë këtë nëse hapim zemrat tona në vend që t’i ftohim ato, nëse tregojmë pak tolerancë dhe përulësi dhe nëse jemi të gatshëm të vendosim veten tonë në vend të personit tjetër, siç thoshte mamaja ime, vetëm për një moment.”
Biden përdori fjalën “unitet” ose “bashkim” 11 herë, duke thënë se ai e dinte se “mund të tingëllojë për disa si një fantazi marrëzie”, por duke këmbëngulur se amerikanët kishin dalë nga momentet e mëparshme të mosmarrëveshjes dhe mund të arrinin sërish ribashkimin.”
“Ne mund të bashkojmë forcat, të ndalim ulërimat dhe të ulim tensionet,” tha ai. “Sepse pa unitet, nuk ka paqe, vetëm hidhërim dhe tërbim. Nuk ka progres, vetëm zemërim. Nuk ka komb, vetëm një gjendje kaosi. Ky është momenti ynë historik i sfidës dhe uniteti është rruga përpara”. Një moment historik, por edhe surreal. Ndryshe nga shumica e inaugurimeve të mbushura me gëzim dhe një ndjenjë të fillimit të ri, përurimi i 59-të i kombit në një ditë të ftohtë por me diell shërbeu për të ilustruar problemet e Amerikës.
Mes frikës nga akte dhune të mëtejshme, Uashingtoni u shndërrua në një kamp të armatosur, me 25.000 trupa të Gardës Kombëtare që u bashkuan me mijëra oficerë policie në bllokimin e një pjese të gjerë të qendrës së qytetit.
Me pandeminë ende në kulm të saj dhe numrin e të vdekurve në 400.000, amerikanëve u tha që të qëndronin larg, duke çuar në ‘spektaklin e frikshëm’ të një presidenti të ri që i drejtohej një Qendre Kombëtare kryesisht bosh, e mbushur jo me njerëz, por me flamuj që kishin për qëllim të përfaqësonin turmën që mungonte. Biden dhe shumica e pjesëmarrësve mbanin maska gjatë shumicës së aktiviteteve. Shumë tradita përuruese u hoqën për shkak të virusit, duke përfshirë një drekë me udhëheqësit e kongresit në Statuary Hall dhe një paradë poshtë Avenue të Pensilvanisë.
Në vend të kësaj, Biden pas betimit në Kapitol vazhdoi në Shtëpinë e Bardhë i shoqëruar nga banda marshimi ushtarake, si dhe nga daulle nga Universiteti i Delauare dhe Universiteti Houard. Biden dhe gruaja e tij, Jill Biden, djali i tij Hunter Biden dhe vajza e tij Ashley Biden, si dhe nipër e mbesa dhe të afërm të tjerë, dolën nga autokolona për të ecur në blloqet e fundit për në Shtëpinë e Bardhë.
“Një komb që nuk është i thyer, por thjesht i paplotësuar.”
Në mënyrën karakteristike, Trump sfidoi zakonin duke lënë Uashington disa orë para betimit, megjithëse Mike Pence, zv.presidenti i tij, mori pjesë. Në fjalimin e tij për mbështetësit para se të hipte në Air Force One, Trump ende nuk mundi ta përmendte emrin e Biden por tha, “Unë i uroj administratës së re fat dhe suksese të mëdha”. Ai e la shënimin tradicional për pasardhësin e tij, të cilin Biden më vonë e quajti “një letër shumë bujare”.
Biden shprehu keqardhje për mungesën e Trump, por u përpoq të projektojë kauzën e përbashkët me udhëheqësit republikanë si dhe demokratët në Kapitol në një mbledhje pas ceremonisë.
Ndër të tjera, Biden lëshoi një urdhër kombëtar për mbajtjen e maskave me detyrim për punëtorët federalë dhe pronën federale, kërkoi të zgjasë një pauzë për lehtësimin e huasë studentore, pezulloi ndërtimin e murit kufitar të Trump me Meksikën, hoqi ndalimin e udhëtimit në disa vende kryesisht myslimane, ndalimet dhe diskriminimin nga qeveria federale bazuar në orientimin seksual ose identitetin gjinor.
“Javët dhe muajt e fundit na kanë dhënë një mësim të dhimbshëm,” tha Biden. “Ka të vërteta dhe ka gënjeshtra, gënjeshtra të thëna për pushtet dhe për përfitim, dhe secili prej nesh ka detyrë dhe përgjegjësi si qytetar, si amerikan dhe veçanërisht si udhëheqës, udhëheqës që janë zotuar të nderojnë Kushtetutën tonë dhe të mbrojnë kombin tonë, për të mbrojtur të vërtetën dhe për të mposhtur gënjeshtrat.”
Një senator për një kohë të gjatë, ish-zv.presidenti, Biden krenohet me përvojën e tij dhe shpreson të krijojë një partneritet me senatorin Mitch McConnell të Kentucky, udhëheqësi i pakicës dhe republikanët e tjerë.
Biden praktikon llojin e politikës së ndjeshmërisë së dhembshurisë dhe politikën e thirrjes në çdo kohë e marrëdhënieve të ilustruara nga Presidenti i parë George Bush. Në moshën 78 vjeç, Biden është presidenti më i vjetër në historinë amerikane më i vjetër në ditën e tij të parë në detyrë sesa Ronald Reagan.
Biden arriti në majën e pushtetit me një mbështetje publike. Pesëdhjetë e shtatë për qind e amerikanëve e shohin si shpresëdhënës atë, sipas Gallup.
Biden dhe Harris sjellin një larmi të re në nivelin më të lartë të qeverisë. Biden është presidenti i dytë katolik pas John F. Kennedy. Harris, 56 vjeç, një ish-senatore dhe prokurore e përgjithshme e shtetit nga Kalifornia, theu pengesat e shumta gjinore dhe racore në rolin e zv.presidentes.
Në ceremoninë e Capitolit interpretuan Lady Gaga, Jennifer Lopez dhe Garth Brooks, ndërsa një mori artistësh të tjerë të famshëm morën pjesë në një “Paradë Përtej Amerikës” virtuale të transmetuara drejtpërdrejt nga 56 shtete dhe territore.
Në vend të kërcimeve zyrtare, çiftet morën pjesë në një program 90-minutësh në mbrëmje televiziv të quajtur “Celebrating America” të organizuar nga aktori Tom Hanks ku interpretuan edhe yje si Kerry Uashington, Bruce Springsteen, Eva Longoria, Lin-Manuel Miranda dhe Demi Lovato.
Përkthyer dhe përshtatur nga The New York Times/ F.H, Konica.al
VAZHDO TË LEXOSH MË TEPËR PËR TEMËN
