Lady Gaga ishte e prnaishme në inaugurimin e Joe Biden për të performuar. Këngëtarja u ngjit në skenë dhe këndoi himnin kombëtar shoqëruar nga banda e marinës amerikane.
“Kjo është një ditë paqeje për të gjithë amerikanët. Një ditë për dashurinë, jo urrejtjen. Një ditë për pranimin dhe jo frikën”, shkroi Gaga në rrjete sociale për ditën e inaugurimit.
Ajo tërhoqi vëmendjen e të gjithëve me veshjen e saj shumë të veçantë, me të cilën edhe performoi në skenë. Lady Gaga kishte zgjedhur që në këtë ditë speciale të vishte një xhaketë të zezë që i rrinte pas trupit dhe një fund të gjatë të kuq që ishte i fryrë. Këngëtarja performoi me një mikron prej floriri dhe në xhaketën e saj kishte vendosur po ashtu një pëllumb prej ari.
Pëllumbi ishte ai që tërhoqi vëmendjen e të gjithëve, pasi ishte një detaj që binte shumë në sy. Ndaj këngëtarja është detyruar të shpjegojë se çfarë mesazhi fshihej pas tij. Ajo ka postuar një foto në Instagram dhe ka treguar se përmes pëllumbit që mban edhe një degë ulliri dëshironte të përcillte tek të gjithë një mesazh për paqe.
“Një pëllumb që mban një degë ulliri. Shpresoj që të gjithë ne të bëjmë paqe me njëri-tjetrin”, ka shkruar këngëtarja në një postim në Twitter.
Para se të performonte këngëtarja u shpreh se ndihej e nderuar që i ishte besuar të këndonte himnin kombëtar për inaugurimin e Joe Biden si president.
“Të këndoj himnin kombëtar për amerikanët është nder për mua. Unë do të këndoj gjatë një ceremonie, gjatë një tranzicioni, një moment ndryshimi. Për mua, kjo ka një kuptim shumë të madh. Qëllimi im është që të pranojmë të shkuarën tonë, të shërohemi për të ardhmen tonë dhe të jemi pasionant për një të ardhme ku ne punojmë bashkë me dashuri. Unë do të këndoj tek zemrat e gjithë njerëzve që jetojnë në këtë tokë”, shkroi Gaga para performancës.
VAZHDO TË LEXOSH MË TEPËR PËR TEMËN
