Performanca e Zlatan Ibrahimoviç në Festivalin e Sanremos, ku është bashkë-prezantues i këtij edicioni, nuk ka shkuar ashtu siç shpresonte sulmuesi suedez, i cili është bërë objekt talljesh në rrjetet sociale.
Një nga momentet e shumëpritura nga tifozët, ishte ai ku futbollisti i Milanit do të tregonte talentin e tij edhe si këngëtar, përkrah Sinisha Mihajloviç. Të dy kishin të planifikuar një duet të këngës “Unë, vagabondi”.
Por pas pak çastesh u kuptua qartësisht se talenti i Ibrahimoviç është shumë larg muzikës pasi qartësisht ai dukej në vështirësi, ashtu si Mihajloviç, i cili të paktën arriti të kapte disi notat e refrenit.
Një paraqitje për të cilën sulmuesi është “masakruar” në rrjetet sociale nga tifozët e shumtë që e kanë cilësuar një dështim këtë performancë dhe një spektakël që mund të evitohej nga producentët.
Këta të fundit kanë qenë në qendër të kritikave që kur u mësua se Ibrahimoviç do të përfitonte një shumë të konsiderueshme prej 250 mijë eurosh, të cilat më pas sulmuesi deklaroi se do t’i jepte në bamirësi.