26.03.2021 - 11:03
Sot nis vaksinimi i stafit akademik të universitetit “Aleksandër Moisiu” të Durrësit.
Në ambientet e kampusit universitar në Spitallë është ngritur qendra e vaksinimit. 160 pedagogë kanë pranuar të vaksinohen në këtë fazë të parë, ndërsa për pedagogët hezitues do të ketë dhe një mundësi tjetër.
Të interesuar për procesin janë dhe anëtarët e stafit administrativ të universitetit, të cilët në masën 70 përqind kanë konfirmuar se duan të vaksinohen.
Ndërkaq vijon vaksinimi i stafit pedagogjik të sistemit parauniversitar publik. Deri më sot janë vaksinuar afro 50 përqind e mësuesve të shkollave të Durrësit, ndërsa është planifikuar që të kryhet vaksinim edhe javën e ardhshme, pasi ka shtim kërkesash nga mësuesit.
