MENU
klinika

Nga Mustafa Nano

Politikanë të ndershëm, por jo të varfër

07.10.2021 - 09:22

Nga Mustafa Nano

Para disa ditësh, disa portale shqiptare publikuan me bujë një lajm mbi presidentin e republikës italiane Sergio Mattarella, të cilit po i mbaron mandati. Lajmi thoshte se Mattarella vetë, i shoqëruar nga e bija, ishte parë në një lagje të Romës, diku afër qendrës, ngaqë po kërkon një shtëpi me qira.

Zonja që jepte shtëpinë me qira ishte kapur në befasi kur kishte parë Presidentin te dera e shtëpisë. Ajo priste një klient, por nuk dinte se kush ishte.

Dhe me ta parë, i kërkoi të bënte një selfie. Sigurisht, shumëkush do t’i kërkonte një selfie. Dhe deri këtu ngjarja është i vërtetë. Dhe ia vlen ta trajtosh e shesësh si lajm. Nuk ndodh çdo ditë që një president republike të dalë vetë për të kërkuar një shtëpi me qira.

Por gazetat tona e tepronin më pas, kur këtë ngjarje e lexonin si provë të faktit që Mattarella është i varfër. Ndryshe, nuk kishte pse merrte shtëpi me qira. Mund ta blinte shtëpinë. Hëm, kjo është një logjikë që nuk qëndron. Nuk është hiç e thënë që kush merr shtëpinë me qira është i varfër.

Përkundrazi, shpesh herë është provë se i ke xhepat plot. Dhe me që ra fjala, Mattarella i ka xhepat plot. Nuk ka në perëndim politikanë të varfër. Ka politikanë të ndershëm, por jo të varfër. Në vendet e perëndimit, një deputet merr një rrogë shumë të mirë, dhe përveç rrogës ka edhe përfitime të tjera legale që nuk e lënë të varfër.

Të ardhurat mujore që merr një anëtar i parlamentit Italian janë pothuaj 15 mijë euro. Përsëris: 15 mijë euro në muaj. Ndërsa Presidenti i republikës, meqë jemi te Mattarella, merr shumë më tepër. Saktësisht, ai merr pothuaj 20 mijë euro në muaj. Dhe ai ka fituar më shumë para se të bëhej qiraxhi në pallatin presidencial Quirinnale.

Nga viti 2008 deri në vitin 2005, kur u zgjodh President, ai fitoi pothuaj 3 milionë euro në punë të rëndësishme, si deputet, senator, anëtar i gjykatës kushtetuese. Si anëtar i gjykatës kushtetuese ai fitonte gati 500 mijë euro në vit.

Shkurt, Sergio Mattarella nuk është i varfër. Kjo nuk do të thotë që nuk është i ndershëm, megjithatë. Përkundrazi, imazhi i tij public, edhe pse ka qenë një jetë të tërë në politikë, ka mbetur një nga më të panjollosurit. Por përsëris: nuk është i varfër. Dhe shtëpinë me qira nuk e merr ngaqë është i varfër. E merr se ashtu i ka punët: i duhet një shtëpi me qira.

Ah, ka vetëm një gjë që duhej nënvizuar te lajmi mbi Mattarella-n. Përunjësia e thjeshtësia e tij. Fakti që ai ka shkuar ta shohë me sytë e vet shtëpinë që do të merrte me qira, ka shkuar pa zhurmë, pa pompë, tamam si secili prej nesh, flet shumë për thjeshtësinë e tij.

Ky është Mattarella. Sergio Mattarella. Presidenti i Republikës italiane, të cilit i mbaron mandati presidencial në fillim të vitit tjetër. Duan ta rizgjedhin, por ai u ka thënë: Jo, faleminderit. Dhe kjo është një provë tjetër e integritetit të tij moral.

 

REMOTE_ADDR:[]