“Pyet mjekun” është rubrika më e re, një platformë që bën të mundur kontaktin ndërmjet mjekut dhe pacientit.
Nëse keni ndonjë pyetje, për gjithçka që ju shqetëson në shëndetin tuaj, këtu do të merrni përgjigje nga mjekë me eksperiencë, pa rezervime takimesh dhe duke shmangur radhët e gjata.
Pacienti: Si të luftojmë lodhjen kronike?
Mjeku: Nëse keni probleme me menaxhimin e sindromës së lodhjes kronike, duhet t’i kushtoni vëmendje dietës ushqimore.
E karakterizuar nga një lodhje ekstreme, mendimet e paqarta dhe ndjesia e mërzitjes, sindroma e lodhjes kronike prek më miliona njerëz në të gjithë botën, sipas Qendrës Mjekësore të Universitetit të Marilandit. (Këto simptoma janë të përgjithshme dhe mund të sinjalizojnë edhe për probleme të tjera shëndetësore).
Nëse mendoni se mund të vuani nga sindroma e lodhjes kronike, bëni një vizitë mjekësore për të përcaktuar saktë diagnozën. Deri tani nuk ka një kurë të veçantë për këtë sindromë, megjithatë, ndryshimet në mënyrën e jetesës, përfshirë ushqyerjen e shëndetshme, mund të ndihmojnë në mbajtjen nën kontroll të simptomave.
Zëvendësoni karbohidratet e rafinuara me ato komplekse
Ndryshe nga drithërat dhe karbohidratet komplekse, ato të rafinuara kalojnë nëpër një sërë përpunimesh që zhveshin shtresat e drithës, largojnë lëndët ushqyese, si fibrat. Nga ana tjetër, ushqime të tilla të përpunuara, si buka e bardhë apo makaronat e bardha, kalojnë nëpërmjet sistemit digjestiv shpejt se drithërat komplekse. Kjo shkakton rritje të niveleve të sheqerit në gjak dhe sindromën e lodhjes kronike.
Për të mbajtur nën kontroll nivelet e sheqerit në gjak dhe energjitë tuaja, zgjidhni më mirë karbohidrate komplekse, si elb, bollgur, kuinoa, bukë prej gruri. Ato janë të pasura në fibra, prandaj treten më ngadalë dhe mbajnë nivelet e sheqerit në gjak dhe energjisë më të stabilizuara.
Ushqehuni me yndyra të shëndetshme
Ashtu si shumë sëmundje kronike, edhe sindroma e lodhjes kronike lidhet me nivelet e larta të inflamacionit. Edhe pse yndyrat e ngopura e përkeqësojnë edhe më shumë inflamacionin, ato të shëndetshme mund ta parandalojnë dhe luftojnë atë. Yndyrat e shëndetshme treten gjithashtu ngadalë, prandaj mbajnë të qëndrueshme nivelet e sheqerit në gjak dhe të energjisë.
Disa nga burimet më të mira të yndyrave të shëndetshme janë frutat e thata, vaji i ullirit, avokado, salmoni etj. Ndërsa yndyrat e ngopura zakonisht gjenden tek vaji që përdorin në fast food-e, pite të gatshme dhe kokoshka. Për të identifikuar yndyrat “trans”, mjafton të lexoni në etiketat e përbërësit dhe të kërkoni për fjalën “hydrogenated”, që tregon se produkti përmban yndyra të ngopura.
Konsumoni më shumë ushqime të pasura me vitaminë B
Sidomos ato që janë të pasura me vitaminë B12 (si mishi i shpendit, vezët dhe peshku) dhe folate (si perimet gjelbra, brokoli dhe frutat qitro). Këto vitamina ndihmojnë mitokondrinë – pjesë e qelizave përgjegjëse për prodhimin e energjisë – të funksionojë siç duhet. Instituti i kërkimeve shkencore të Neuroshkencës dhe Psikologjisë sugjeron se marrja mjaftueshëm e këtyre vitaminave mund të ndihmojë në lehtësimin e simptomave tek njerëzit që vuajnë nga sindroma e lodhjes kronike.
Mos abuzoni me kafeinën
Në doza të vogla, kafeina mund t’ju japë energji. Por, ashtu si karbohidratet e përpunuara, abuzimi me të mund të shkaktojë rritje të niveleve të energjisë mbi normalen, kështu harxhoni shumë energji. Mund të prekë gjithashtu edhe gjëndrat mbiveshkore, duke jua shkaktuar ndjesinë e lodhjes dhe dhimbjes.
Sa kafeinë duhet të merrni që të mos vuani këto pasoja. Në përgjithësi, ekspertët rekomandojnë 400 ml ose më pak kafeinë, ekuivalente me 2 filxhanë kafe. Megjithatë, kjo varet nga personi dhe gjendja e tij shëndetësore. Disa njerëz janë më të ndjeshëm ndaj kafeinës se të tjerët.
Qëndroni të hidratuar
Edhe një dehidratim i lehtë mund t’ju japë ndjesinë e lodhjes dhe të ankthit. Pa hidratimin e duhur, toksinat nuk nxirren siç duhet nga gjëndrat e djersës. Gjaku gjithashtu nuk mund të qarkullojë siç duhet për të transportuar qelizat e bardha të gjakut, luftuese të sëmundjeve, aty ku nevojiten më shumë.
Duke qenë se nevoja për hidratim mund të variojë në bazë të faktorëve të tilla si mosha, pesha, gjendja klimatike dhe nivelet e aktivitetit, nevoja për ujë mund të jetë më e lartë ose më e ulët se sasia standarde e rekomanduar (8 gota ujë në ditë).
Nëse keni edhe ju pyetje, dhe doni të merrni një përgjigje të shpejtë nga mjekët e “spitalit tonë online”, klikoni këtu. Identiteti juaj do të mbetet anonim.
