MENU
klinika

Rama publikon pyetjen e gjashtë

A duhet të lejohet kultivimi i kanabisit mjekësor në Shqipëri?

23.01.2022 - 12:22

“A duhet të lejohet kultivimi i kanabisit mjekësor në Shqipëri?”, kjo është pyetja që kryeministri Edi Rama u drejton këtë të diel shqiptarëve në kuadër të nismës për këshillimin Kombëtar me qytetarët.

Formularët e Këshillimit Kombëtar për Shqipërinë u janë dërguar tashmë banorëve të Tiranës në shtëpi. Qytetarët mund t’i plotësojnë dhe më pas me anë të një zarfi mund t’i dërgojnë me postë falas në kryeministri.

Ndërkohë qytetarët kanë mundësi që t’i plotësojnë formularët e pyetjeve për bashkëqeverisjen edhe online. Kryeministri Edi Rama në një postim në rrjetet sociale, teksa ka shpërndarë adresën online, i fton qytetarët të plotësojnë formularët dhe thekson se kemi nevojë të lëmë pas krahëve llogoret përçarëse të partive dhe të dëgjojmë më shumë njëri-tjetrin


‘Për të ecur më shpejt e për t’u ngjitur lart, kemi nevojë të lëmë pas krahëve llogoret përçarëse të partive dhe të dëgjojmë më shumë njëri-tjetrin! Ju ftoj të gjithëve të jepni opinionin tuaj në këtë proces popullor që zhvillohet për herë të parë dhe është i hapur për çdo shqiptar, kudoqoftë jeton e banon, pavarësisht bindjeve e simpative politike, duke klikuar si vijon Keshillimi Kombëtar!’- shkruan kreu i qeverisë.

Nga vaksinimi i detyrueshëm te legalizimi i kanabisit, janë disa nga pyetjet që qytetarët do të japin opinionin e tyre përmes Këshillimit Kombëtar. Pyetësori prej katër faqesh, i mbështetur në 5 shtylla, familja, lufta kundër krimit, ekonomi, punësim e integrimi i vendit, nis me pyetjen nëse duhet bërë diferencim për nënat që rrisin 3 ose më shumë fëmijë të mitur në përfitimin e mbrojtjes së veçantë sociale nga shteti.