Borussia Dortmund ka marrë një fitore bindëse 5-1 kundër Freiburg në javën e 19-të të Bundesliga-s. Verdhezinjtë e kanë siguruar fitoren që në pjesën e parë, të mbyllur 3-0.
Në këtë avantazh, verdhezinjtë triumfuan falë golave të Meunier (14′, 29′) dhe Haaland (45+1′). Demirovic (61′) ka ngushtuar përkohësisht diferencat për miqtë, ndërsa Haaland (75′) dhe Dahoud (86′) kanë fiksuar shifrat në 5-1.
Goli i dytë i norvegjezit ka qenë special sepse ka qenë i 2000 për Borussian në një ndeshje të kampionatit të luajtur në shtëpi. Dortmund është vetëm klubi i dytë që e ka arritur këtë shifër në historinë e kompeticionit pas Bayern-it (2629).
Gjithashtu, Haaland ka realizuar në 8 ndeshjet e fundit të Bundesliga-s që ka luajtur në shtëpi, më parë vetëm Pierre Emerick Aubameyang ka patur një ecuri të tillë për Dortmund (11 ndeshje të luajtura në shtëpi mes 2015-ës dhe 2016-ës). Falë kësaj fitoreje, Dortmund ka shkuar përkohësisht vetëm tri pikë larg Bayern-it kryesues në renditje.
