MENU
klinika

“Lëvizin të armatosur, kanë rrjet në mbarë botën”

Dritan Abazoviç: Po marr kërcënime nga persona që…

06.01.2022 - 14:57

Zëvendëskryeministri i Malit të Zi, Dritan Abazoviç deklaroi se vazhdon të kërcënohet nga persona të cilët, siç thotë ai, janë shumë të rrezikshëm dhe që kanë rrjet në mbarë botën.

Pas arrestimit të njërit prej anëtarëve më të shquar të klanit të Kavaçit, Slobodan Kasçelan, kreut të URA-s, zv.kryeministrit të Malit të Zi, iu forcua siguria me arsyetimin se i rrezikohej jeta.

Në një intervistë për të përditshmen nova.rs, Abazoviç tha se nuk ka dashur asnjëherë të komentojë shumë këto kërcënime, sepse nuk dëshiron të luajë rolin e viktimës.

“Nuk dua që të bie shumë në sy. Njerëzit shpesh, për shkak të disa tekave të tyre politike dhe paturpësisë politike, bëjnë një aferë prej saj. Kjo është jashtëzakonisht e shëmtuar. Nuk jam ndjerë kurrë si viktimë, këtë e kam zgjedhur vetëm dhe çdo gjë është bërë me vullnetin tim. Nuk dua ta ngarkoj publikun me kërcënime, presione, të cilat i marr çdo ditë. Kjo është puna më e vështirë që mund të bëjë dikush, e cila i shqetëson më shumë njerëzit”, nënvizoi politikani shqiptar.

“Këta janë njerëz që kanë qindra milionë euro, që shëtisin të armatosur, të cilët qëndrojnë pas vrasjeve të shumta apo akuzohen për to. Ata kanë një rrjet në të gjithë botën. Këtyre njerëzve ua kemi prishur rehatinë”, tha ai.

Abazoviq ka pohuar muaj më parë se nuk do të ndalet së luftuari krimin e organizuar dhe korrupsionin në shtetin malazez.