MENU
klinika

Roli i shqiptarëve në grupet kriminale

I penduari i mafias italiane, tregon skemën e trafikimit të drogës

26.01.2022 - 21:10

Në botën e mafias italiane, kryesisht asaj që vepron në Foggia ka filluar të shembet edhe muri i heshtjes. Kjo po tregohet edhe nga të penduarit e disa prej anëtarëve kryesorë të klaneve Gargano, ku tashmë janë katër bashkëpunëtorë të drejtësisë në harkun kohor të disa viteve, pothuajse të gjithë ish-anëtarë të klanit Raduano, ndër më të fuqishmit në qytet.

Ndër ta spikat Danilo Pietro Della Malva i njohur si “Meticcio”, ish-krahu e djathtë e shefit Marco “Pallone” Raduano. Ai ka rrëfyer skemën e trafikimit të tonelatave me drogë në Itali, por edhe rolin e shqiptarëve në trafikun e drogës.

Della Malva, i cili mban statusin e të penduarit dhe dëshmitarit të mbrojtur ka treguar para hetuesve italianë strukturat e botës së krimit, veçanërisht atë të klanit Gargano. Ai ka folur për trafikun e drogës dhe “Gomorran” e Viestes, si dhe luftën që zhvillohej mes klaneve, e cila vitet e fundit ka prodhuar shumë të vdekur, disa prej tyre të rinj.

“Unë i përkisja klanit Raduano i drejtuar nga Marco Raduano dhe Anthony Azzarone të cilët vepronin në territorin e Viestes, Mattinata, Peschici dhe në territore të tjera të zonës Gargano. Veprimtaritë kryesore të klanit varionin nga vjedhjet, grabitjet, armët, droga, zhvatjet, vrasjet dhe tentativa për vrasje. Unë u futa në strukturën e klanit me një rol të rëndësishëm, erdha pas Raduanos dhe Azzarones. Isha një njeri i besuar dhe krahu i djathtë i shefit dhe më pas ishin djemtë e tjerë”, ka rrëfyer Della Malva.

Ai tregon se kishte edhe klane të tjera kriminale që vepronin në zonë, dhe se si shqiptarët i furnizonin ata me drogë.

“Kishte grupe të tjera kriminale që vepronin, në veçanti grupi Iannoli-Perna. Drejtuesi i tyre ishte Girolamo Perna, i cili u vra më vonë; Liderët e rinj janë bërë kushërinjtë Iannoli, Giovanni dhe Claudio. Në të vërtetë, gjatë periudhës në të cilën anëtarët e grupit tonë u ndaluan, grupi Iannoli kishte marrë nën kontroll aktivitetet kriminale. Për të pasur akses në organizatën kriminale, kryerja dhe ekzekutimi i një vrasjeje është një veprim thelbësor sepse rezulton i besueshëm në sytë e anëtarëve të tjerë të organizatës”, ka rrëfyer i penduari.

Ai thekson më tej se lënda narkotike vinte nga Shqipëria dhe se dorëzimi bëhej po nga shqiptarët.

“Lënda narkotike vinte nga Shqipëria dhe dorëzimi bëhej po nga nga shqiptarët. Kjo ka ndodhur në periudhën ndërmjet viteve 2015/2018. Për këtë trafik droge grupi Iannoli-Perna bashkëpunoi me grupin Li Bergolis të Monte Sant’Angelo”, shkruajnë mediat italiane.

Këtu bëhet fjalë për tonelata drogë, shumë prej të cilave janë sekuestruar nga policia gjatë operacioneve të shumta të antimafias italiane.

Sipas asaj që thotë “Meticcio”: Përveç kanaleve të furnizimit me marijuanë nga shqiptarët, grupi Iannoli-Perna merrte kokainë, hashash dhe marijuanë në San Severo nga vëllezërit Nardino.

Deklaratat e Della Malva po shqyrtohen nga hetuesit italianë dhe mund të rezultojnë të jenë thelbësore në gjyqet e mëdha që pritet të bëhen kundër mafias.