Ditët e fundit, e gjithë bota është në ankth me situatën e krijuar në Rusi dhe mundësinë e fillimit të një konflikti me Ukrainën. Mjaft evente sportive të planifikuara për t’u zhvilluar në Rusi, përfshi edhe finalen e Champions League, rrezikojnë të mos zhvillohen.
Mes tyre edhe gara e Çmimit të Madh të Rusisë në Formula 1, e planifikuar të zhvillohet më 25 shtator, në pistën e Sochi. Në rast se situata në Rusi do të përshkallëzohet, atëherë ajo garë do të hiqet nga kalendari dhe pista e Sochi do të zëvendësohet me një pistë tjetër.
Për momentin nuk ka asnjë të dhënë në lidhje me anulimin e kësaj gare, por drejtuesit e Formula 1 mund t’i reagojnë, për të evituar probleme. Anulimi i kësaj gare mund të ketë impakt te skuadra Haas, që ka si sponsor kryesor Uralkali, ndërkohë që një prej pilotëve të saj është rusi Nikita Mazepin.
