“Vladimir Putini, ka ndryshuar. Është shumë e trishtueshme, për botën. Ka ndryshuar shumëçka”
Gjatë një interviste për rrjetin amerikan “Washington Examiner”, Donald Trump pohoi se i ka keqkuptuar qëllimet e Putinit, teksa ky i fundit dërgonte trupa në kufirin me Ukrainën. Trump, pranoi se sipas tij, Vladimir Putini po përpiqej të “negocionte” në këtë mënyrë dhe pushtimi rus ishte një befasi.
Ai u shpreh gjithashtu, se Putini kishte “ndryshuar shumë” dhe besonte se Rusia, nuk do ta kishte pushtuar Ukrainën nëse ai do të qëndronte në Shtëpinë e Bardhë.
“Jam i befasuar. Mendova se po bëhej fjalë për negociata, kur u dërguan trupat ruse në kufirin ukrainas. Kështu m’u duk,” – tha Trump për “Washington Examiner” me telefon, ditën e djeshme, nga ferma e tij në Mar-a-Lago. “M’u duk mënyrë e vështirë, por e zgjuar, për të negociuar”, shtoi ai.
Trump, i cili, dukej se kishte pasur një marrëdhënie pune të ngushtë me Moskën, gjatë detyrës së tij, theksoi se presidenti rus nuk kishte qenë i njëjtë, nga hera e fundit që të dy politikanët kishin punuar së bashku.
“Mendoj se Vladimir Putini, ka ndryshuar. Është shumë e trishtueshme, për botën. Ka ndryshuar shumëçka”, – ishte mesazhi i miliarderit amerikan.
Ndërkohë, Trump është kritikuar gjerësisht, për marrëdhënien me Putinin dhe kjo, kryesisht pasi ai iu shmang kritikave për pushtimin rus të Ukrainës. “Me Putinin, kam qenë shumë, shumë i rreptë. Në të njëjtën kohë edhe shkonim shumë mirë. Por, në fakt, kam pasur marrëdhënie shumë të mira, me shumicën e udhëheqësve të huaj.”