Një skandal ka shpërthyer në Spanjë. Sipas një raporti nga “El Confidencial”, mbrojtësi i Barcelonës, Gerard Pique, mund të arrestohet për korrupsion së bashku me presidentin e federatës spanjolle, Luis Rubiales.
Sipas regjistrimeve dhe dokumenteve të marra nga burimi i lartpërmendur, Pique dhe Rubiales, arritën një marrëveshje për t’u bërë presion autoriteteve në Arabinë Saudite për të paguar një shumë prej 24 milionë euro për të pritur Superkupën e Spanjës.
Dokumentet dhe audiot zbulojnë se Rubiales ra dakord të paguante Pique rreth 6 milionë euro për marrëveshjen dhe u përpoq të fshihte përfshirjen e mbrojtësit të Barçës në kontratat dhe dokumentat zyrtarë.
Pique kishte ndihmuar Rubiales të siguronte marrëveshjen për ta transferuar Superkupën e Spanjës në Arabinë Saudite, me marrëveshjen që do të finalizohej në vitin 2019. Në atë kohë, presidenti i federatës kishte konfirmuar se mbrojtësi kishte ndihmuar në fillimin e negociatave përmes një kompanie të quajtur Cosmos, në të cilën ai është aksioner.
Raporti nga “El Confidencial” pretendon se Pique dhe Rubiales kishin qenë në diskutime që nga viti 2018, me veteranin e Barcelonës duke sugjeruar idenë për ta bërë turneun me katër skuadra që luajnë gjysmëfinalen para finales, për të rritur vlerën komerciale. Rubiales ishte dakord me planin dhe i dha Pique “dritën jeshile” për të eksploruar blerës të mundshëm për të drejtat televizive.
Në të njëjtën kohë, ideja fillestare ishte që turneu të zhvillohej ose në “Santiago Bernabeu”, ose “Camp Nou”, përpara se të mbyllej transferimi në Arabinë Saudite. Një bisedë nga audio e rrjedhur nga “El Confidencial” e fokuson Rubiales duke i thënë Pique:
“Geri! Urime. Dhe jo për lojën tuaj të mrekullueshme dje, apo për golin tuaj. Ka kaluar ora 12, që do të thotë se marrëveshja me Arabinë Saudite është nënshkruar. Faleminderit për gjithçka. Unë jam këtu për çdo gjë që ju nevojitet. Një përqafim i madh. Kujdesu për veten!”
Më shumë biseda zbulohen në raportin në të cilin Pique mund të dëgjohet duke bindur Rubiales për të vazhduar me projektin, kur ai kishte dyshime për shkak të ofertës financiare të propozuar në gusht 2019. Fjalët e Pique nga audio e rrjedhur mund të gjenden më poshtë:
“Shiko Rubi. Nëse është çështje parash, Real Madridit do t’iu mjaftonin nga 8 milionë euro. Ju mund të bëni 2 milionë euro dhe 1 milionë euro për dy të tjerët. Dhe federata mund të qëndrojë me 6 milionë euro. Ne mund ta shtyjmë Arabinë Saudite për 1-2 milionë euro shtesë”.
“Rubi, e kuptoj pozicionin tënd, por mendo për këtë. Nëse të gjithë e shohin që ju do ta bënit atë, atëherë tërhiquni, por do ta përdorin kundër jush. Ata do të thonë që nuk do të shkosh më në Arabinë Saudite sepse u kapët. Unë do të mendoja për këtë”.
Që kur marrëveshja u finalizua me Arabinë Saudite, Federatës Spanjolle të Futbollit i është garantuar një pagesë prej 40 milionë euro çdo vit. Përveç kësaj, paga e Rubiales është rritur gjithashtu shumëfish. Më tej në raport thuhet se Pique po merr një pagesë neto prej 4 milionë euro në vit përmes kompanisë së tij Kosmos për përfshirjen në marrëveshje.
Kontrata gjithashtu parashikon që kompeticioni mund të anulohet në çdo kohë nëse Kosmos nuk i merr pagesat në kohën e duhur. Para edicionit të parë të Superkupës në Arabinë Saudite, Pique i tha Rubiales:
“Ata thanë se do të paguajnë nesër. Puna është se ata thanë se do t’ju paguajmë vetëm, por…Nuk do të kishte kuptim nëse nuk do të na paguanin edhe neve. Të gjithë duhet të paguhemi. Nëse nuk e bëjmë, nuk do të shkojmë. Kam nevojë për mbështetjen tuaj”. As Pique dhe as Rubiales nuk i kanë komentuar këto zbulime tronditëse. Nga kjo situatë mund të priten pasoja serioze më tej
VAZHDO TË LEXOSH MË TEPËR PËR TEMËN
