Kina ka sinjalizuar se mund të humbasë objektivin e saj vjetor të rritjes ekonomike, pasi kufizimet kovid rëndojnë mbi ekonominë e dytë më të madhe në botë.
Të enjten, Byroja Politike – organi më i lartë politikbërës i Partisë Komuniste në pushtet – tha se synon të mbajë rritjen brenda “një diapazoni të arsyeshëm”. Ai nuk përmendi objektivin zyrtar të rritjes prej 5.5% që kishte vendosur më parë.
Kina po vazhdon të ndjekë një politikë zero-kovid që i ka vendosur qytetet e mëdha në bllokime të plota ose të pjesshme. Në një deklaratë pas takimit të saj ekonomik tremujor, Byroja Politike 25 anëtarësh, e cila kryesohet nga Presidenti Xi Jinping, tha se udhëheqësit do të “përpiqen të arrijnë rezultatet më të mira të mundshme”. Megjithatë, ai u bëri thirrje gjithashtu provincave më të forta të punojnë për të përmbushur objektivat e tyre të rritjes.
Analistët thanë se mungesa e përmendjes së PBB-së ishte e dukshme, megjithëse ekonomistët kishin parashikuar më herët se do të ishte e vështirë për Kinën të arrinte objektivin e saj prej 5.5%. “Objektivi i rritjes prej 5.5% nuk është më i domosdoshëm për Kinën,” tha Iris Pang, kryeekonomistja e Kinës në ING Bank, për gazetën Wall Street Journal. Ata gjithashtu shtuan se Kina po u kërkonte provincave më të mëdha të kompensonin ato që ishin më të prekura nga bllokimi.
“Pekini kërkoi që provincat që janë relativisht të pozicionuara mirë duhet të përpiqen të arrijnë objektivat ekonomike dhe sociale për këtë vit,” thanë në një shënim analistët e Nomura, Ting Lu, Jing Wang dhe Harrington Zhang. “Ne mendojmë se Pekini po sugjeron që objektivat e rritjes së PBB-së për provincat me kushte më pak të favorshme, veçanërisht për ato që u goditën rëndë nga varianti Omicron dhe bllokimet, mund të jenë më fleksibël.”
Në fillim të këtij muaji, Kina tha se ekonomia e saj ishte tkurrur ndjeshëm në tremujorin e dytë të këtij viti.
Qytetet e mëdha kineze, përfshirë qendrën kryesore financiare dhe prodhuese të Shangait, u vunë në bllokime të plota ose të pjesshme gjatë kësaj periudhe. Tregu dikur i lulëzuar i pronave në Kinë është gjithashtu në një rënie të thellë dhe shitjet e shtëpive kanë rënë për 11 muaj rresht. Disa zhvillues kinezë kanë ndaluar ndërtimin e shtëpive që tashmë ishin shitur, për shkak të shqetësimeve mbi fluksin e parave.
Javët e fundit, disa blerës shtëpish kanë kërcënuar se do të ndalojnë pagesën e hipotekave të tyre derisa puna të rifillojë. Në vitin 2020, Kina mori vendimin e rrallë për të hequr objektivat e saj të PBB-së, në dritën e pandemisë.
GDP mat madhësinë e një ekonomie. Matja e zgjerimit ose tkurrjes së saj është një nga mënyrat më të rëndësishme për të matur se sa mirë ose keq është një ekonomi dhe që monitorohet nga afër nga ekonomistët dhe bankat qendrore.
Ai gjithashtu ndihmon bizneset të gjykojnë se kur duhet të zgjerohen dhe të rekrutojnë më shumë punëtorë ose të investojnë më pak dhe të shkurtojnë fuqinë e tyre të punës.
/Përkthyer dhe përshtatur për Konica.al nga BBC
VAZHDO TË LEXOSH MË TEPËR PËR TEMËN
Ekonomia globale drejt një tjetër recesioni?
Azia është përjashtimi global i inflacionit
Kur do e sundojë Kina botën?
