Nëse Nord Stream 1 mbetet i mbyllur, furnizimi i Gjermanisë me gaz mund të “kolapsohet” dhe ekonomia mund të përballet me një recesion të rëndë.
Peter Adrian, President i Shoqatës së Dhomave Gjermane të Industrisë dhe Tregtisë në një artikull të botuar nga Deutsche Presse shprehet se pasi të përfundojë mirëmbajtja në 21 Korrik e Nord Stream 1 dhe ndalohet furnizimi me gaz, produkti i brendshëm bruto i Gjermanisë mund të tkurret me 10 për qind ose më shumë në dimër.
Teksa qeveria gjermane po përpiqet të ndërtojë një terminal të gazit natyror të lëngshëm, ai nuk do të hapet në kohë për këtë dimër. Pa gaz, shumë biznese gjermane do të duhet të mbyllen, duke përfshirë disa prodhues ushqimesh që përdorin gaz në prodhimin e tyre.
Frans Timmermans, nënkryetar ekzekutiv i Komisionit Evropian për Marrëveshjen e Gjelbër Evropiane, ka bërë të ditur se mund të ketë një rrezik konflikti dhe mosmarrëveshjeje në Evropë këtë dimër për shkak të një krize energjie.
Sipas ekspertëve të ekonomisë Bashkimi Evropian duhet të përgatitet për periudha shumë të vështira. Për të shmangur të gjitha llojet e problemeve sociale të shkaktuara nga kriza energjetike, BE-ja duhet të rifillojë përdorimin e lëndëve djegëse fosile në një afat të shkurtër.
Sanksionet në rritje nga Shtetet e Bashkuara dhe vendet e tjera perëndimore ndaj Rusisë nuk arritën të kishin efektin e dëshiruar, por qartësisht kanë përkeqësuar mungesën e energjisë në Evropë.
Presidenti rus Vladimir Putin së fundmi ka deklaruar se përpjekjet e vendeve evropiane për të zëvendësuar energjinë ruse shkaktuan çmime më të larta të gazit dhe kosto më të larta të energjisë për konsumatorët, gjë që dëmtoi edhe më shumë ato vende që vendosën sanksione.
Nëse sanksionet perëndimore kundër Rusisë vazhdojnë, ato mund të çojnë në pasoja katastrofike për tregjet globale të energjisë. Ministri gjerman i Ekonomisë Robert Habeck për Deutschlandfunk u shpreh se mungesa e gazit do ta vendosë Gjermaninë para një sprove të skajshme. Një situatë e tillë mund të mënjanohe, nëse kursehet gazi, tha Habeck.
