Kina lëshon fuqinë e saj: Indinjatë në mbarë botën ndërsa raketat balistike fluturojnë mbi Tajvan duke bërë që Japonia të kërkojë ndalimin ‘e menjëhershëm’ të stërvitjeve ushtarake ose rrezikon të shkatërrojë paqen në rajon
Situata në bregun lindor të Paqësorit nuk është më e qetë pas largimit të krye-kongresmenes amerikane, Nancy Pelosi me Kinën që ka shpalosur fuqinë e saj ushtarake, duke vendosur në epiqendër të stërvitjes Tajvanin.
Ditën e djeshme ushtria kineze ka lëshuar një “lumë” raketash balistike të cilat fluturuan mbi ishull dhe gabimisht ranë në ujërat japoneze.
Siç ishte premtuar nga Partia Komuniste në pushtet, katër ditë stërvitje luftarake që rrethon Tajvanin filluan pak para orës 14:00 me valë lëshimesh raketash, ndërsa avionët kinezë u ngritën në qiell dhe dhjetë anije luftarake patrulluan detin.
Tajvani mbajti frymën për dy orë, ndërsa Kina tregoi muskujt e saj ushtarakë, me gjuajtjen e 11 raketave balistike të mbështetura nga një sërë raketash më të vogla, me rreze më të shkurtër veprimi, të cilat u ulën në veri-lindje dhe jug-perëndim të ishullit.
Media shtetërore e Pekinit pretendoi se më shumë se 100 avionë, duke përfshirë avionë luftarakë dhe bombardues, dhe dhjetë anije luftarake ishin bashkuar në stërvitje.
Taipei nuk do të konfirmonte nëse raketat kishin fluturuar drejtpërdrejt mbi ishull, por politikani tajvanez Wang Ting-yu tha se do të kishte pasoja të tmerrshme për çdo sulm ushtarak.
“Ne duhet t’i bëjmë të ditur armikut tonë se ne jemi të përgatitur. Nëse guxoni të bëni një marrëzi, do të dështoni dhe çmimi është shumë i lartë. Shpresa e sinqertë e Tajvanit është se ne mund të ruajmë paqen dhe sovranitetin tonë përgjithmonë. Dhe ne shpresojmë se Kina mund të bëhet një vend i arsyeshëm dhe më i civilizuar. Por një vend nuk mund të mbijetojë me ëndrra”, tha ai.
Për sa kohë që stërvitjet vazhdojnë, Pekini në mënyrë efektive do të bllokojë fqinjin e tij në atë që analistët druajnë se mund të jetë një praktikë për një pushtim në shkallë të plotë.
Global Times, gazeta shtetërore në gjuhën angleze në Kinë, i përshkroi hapur aktivitetet si një “operacion provë për ribashkimin”.
Stërvitjet luftarake kërcënojnë gjithashtu të prishin një nga korsitë më të ngarkuara të transportit në botë. Gati gjysma e anijeve të botës kaluan përmes ngushticës së ngushtë të Tajvanit, që ndan ishullin nga Kina, në shtatë muajt e parë të këtij viti. Presidenti kinez Xi Jinping është zotuar të ribashkojë Tajvanin dhe Kinën kontinentale, të cilat u ndanë në vitin 1949 pas një lufte civile.
Stërvitjet ushtarake që ai ka sanksionuar u mbështetën nga një breshëri retorikash nga zyrtarët e Pekinit mbrëmë. Eksperti ushtarak Song Zhongping tha se operacionet “gjithëpërfshirëse dhe shumë të synuara treguan vendosmërinë e Kinës për të zgjidhur njëherë e përgjithmonë çështjen e Tajvanit”.
Pesë raketa me fuqi të lartë të lëshuara nga kontinenti fluturuan mbi Tajvan, thanë zyrtarët japonezë dhe u zhytën në detin në jug të ishullit Hateruma, pjesë e Okinauas. Seria e ishujve janë pjesë e “zonës ekskluzive ekonomike” të Japonisë, e cila shtrihet 200 milje detare nga bregu i saj.
Agresioni kinez ka shkaktuar një valë reagimesh kundër në komunitetin ndërkombëtar. Pati një protestë të menjëhershme diplomatike nga Tokio dhe kjo ka shtuar frikën se një llogaritje e gabuar e mëtejshme nga Kina mund të ndezë luftë në Paqësor duke prishur balancat globale.
Ministri japonez i mbrojtjes Nobuo Kishi tha: “Kjo është një çështje e rëndë që ka të bëjë me sigurinë kombëtare të vendit tonë dhe sigurinë e njerëzve”.
Ministri i Jashtëm Yoshimasa Hayashi bëri thirrje për ‘ndalimin e menjëhershëm’ të stërvitjeve ushtarake/
“Veprimet e Kinës këtë herë kanë një ndikim serioz në paqen dhe stabilitetin e rajonit dhe komunitetit ndërkombëtar”, tha ai.
Dhe Sekretari amerikan i Shtetit Antony Blinken paralajmëroi Kinën.
“Vendet në mbarë botën besojnë se përshkallëzimi nuk i shërben askujt dhe mund të ketë pasoja të padëshiruara që nuk i shërbejnë interesave të askujt. Shpresoj shumë që Pekini të mos prodhojë një krizë apo të kërkojë një pretekst për të rritur aktivitetin e tij agresiv ushtarak”, tha ai.
Por shqetësimet me sa duket u hodhën poshtë nga qeveria kineze mbrëmë pasi Ushtria Çlirimtare Popullore rifilloi stërvitjet e saj të rrezikshme.
Katër prej flotës së madhe të dronëve pa pilot të Pekinit u vunë re mbi ishujt Kinmen të Tajvanit, afër kontinentit kinez, duke nxitur trupat vendase të kundërpërgjigjeshin me zjarr në një përpjekje për të ndryshuar kursin e tyre.
Në një lëvizje tjetër dramatike, Kina njoftoi se synonte të zgjeronte stërvitjen e luftës me një ditë, që do të thotë se sulmet me raketa mund të vazhdojnë deri të hënën.
Tensionet në Detin e Kinës Jugore mbetën të larta mbrëmë, me anijet e marinës amerikane që patrullojnë ujërat ndërkombëtarë, ndërsa avionët spiun gjurmues të raketave janë dërguar për të vëzhguar stërvitjet.
VAZHDO TË LEXOSH MË TEPËR PËR TEMËN
Nuk është koha për dilemat e Amerikës!
