MENU
klinika

Ndëshkohet me gjobë nga policia

Theu vendimin duke lundruar me skaf jashtë perimetrit të sigurisë në Potam

13.08.2022 - 13:47

Një tjetër rast flagrant është regjistruar në plazhin e Potamit, atje ku ndodhi edhe tragjedia, ku vdiq fatkeqësisht një vajzë 7-vjeçare pasi u përplas nga një skaf. Policia ka reaguar në lidhje me një video të publikuar në rrjete sociale, në të cilën shfaqen mjete lundruese, ndërsa sqaroi se një skaf kishte thyer perimetrin e sigurisë.

Sipas bluve, personi që drejtonte skafin është ndëshkuar me gjobë.

NJOFTIMI I POLICISE

Menjëherë, nga DVKM Vlorë, në bashkëpunim me shërbimet e Komisariatit të Policisë Himarë, bazuar dhe në pamjet filmike, është bërë verifikimi i rastit dhe identifikimi i mjeteve lundruese.

Pas verifikimit ka rezultuar se njëri prej mjeteve lundruese (skaf) ka lëvizur përtej zonës së kufizuar për mjetet lundruese. Nga shërbimet e Policisë Kufitare të Himarës është bërë shoqërimi i mjetit lundrues, në Portin e Himarës.

Në bazë të ligjit nr. 43 të vitit 2020, pronari i këtij mjeti, shtetasi P. P., 49 vjeç, banues në Himarë, u ndëshkua me masë administrative 200.000 lekë të rinj, si dhe u bë bllokimi i mjetit lundrues për 5 ditë, pasi shtetasi P. P. nuk ka respektuar zonën e kufizuar për mjetet lundruese, në plazhin e Potamit, Himarë.

Theksojmë se në vendin ku janë bërë filmimet është i përcaktuar nga bashkia Himarë, korridori për hyrje-daljet e mjeteve lundruese.

Policia Kufitare do të vijojë kontrollet me qëllim garantimin e rendit dhe sigurisë për pushuesit, gjatë sezonit turistik, dhe fton qytetarët që të denoncojnë çdo rast paligjshërie, në aplikacionin Komisariati Dixhital ose të telefonojnë në numrin pa pagesë 112, duke iu garantuar anonimatin, reagim të shpejtë dhe profesional.