“Nji prej nesh”, do të shfaqet në kinematë e kryeqytetit, pas një premiere ndërkombëtare, në Festivalin e Cottbusit.
Ai është filmi me të cilin regjisori Ergys Meta debuton në metrazh të gjatë dhe është bashkëprodhim midis Shqipërisë, Kosovës e Maqedonisë së Veriut.
Filmi do të shfaqet premierë në datë 17 Nëntor në orën 19:10 në Kinema Millenium.
“NJI PREJ NESH”, eshte historia e Sulës, një efektivi policie, i cili vuan nga çrregullimet e stresit post-traumatik. Gjendja e tij rëndohet në kontakt me realitetin e përditshëm toksik te kryeqytetit. Ai ndjen se duhet të bëjë diçka që t’i jap kuptim jetës së tij. Por deri ku është i gatshëm të shkojë Sula për të bërë drejtësi, në një qytet ku korrupsioni ka kapur majat e hierarkisë së pushtetit?
“NJI PREJ NESH” është një udhëtim eksplorues brenda mendjes së një personi çfarëdo, i cili ndihet i përgjegjshëm të bëjë diçka të rëndësishme për botën që e rrethon.
Regjisori Ergys Meta shpjegon se përse ka zgjedhur të prezantohet me një vepër të tillë për herë parë me metrazh të gjatë.
“Zgjedh NJI PREJ NESH si vepër e parë sepse vendi im është i mbushur plot histori të tilla që në shumicën e rasteve mbesin të parrëfyera. Ndihem i përgjegjshëm të denoncoj një anomali shoqërore duke e vizualizuar me nota kinematografike një zgjidhje që do ringjall shumë pyetje, të cilave i takon audiences Shqiptare dhe të huaj t‘i pergjigjet. Dëshiroj ta tregoj këtë ngjarje në mënyrë të thjeshtë dhe të drejtpërdrejtë.“
Stili i filmit, Ballkan neo-noir metropolitan është një zhanër i cili ka gjetur një terren pjellor në botën e sotme të ngopur me filma me superheronj. Kryesisht sepse neo-noir rrotullohet rreth nje personazhi në petkun e një dedektivi që lufton i vetëm dhe me mjete pak ortodokse për të zgjidhur një mister, duke e bërë të jetë një anti-hero. Rrjedhimisht ai shëndrrohet në një figurë shumë popullore për publikun në mbarë botën. Qëllimi i këtij tregimi filmik është që një person çfarëdo pavarësisht nga aspekti social-kulturor, bëhët një element shumë i rëndësishëm i gjithë shoqërisë. Për regjizorin Ergys Meta historia e treguar nga këndveshtrimi i anti-heroit ka një kuptim që shkon përtej moralit.
Pos Alban Ukajt që portretizon personazhin kryesor, kasta e aktorëve përbëhet edhe nga aktorë të tjerë të njohur, si Kasem Hoxha, Alfred Trebicka, Enkel Gurakuqi, Enisa Hysa, Romir Zalla, Alessia Xhemalaj e të tjerë.
