Ndjenja e keqardhjes shpesh gjeneron surpriza politike.
Dhe kjo është gjithmonë në dobi të armiqve të demokracisë.
Shumë gjëra po ndodhin në Evropë dhe veçanërisht në Greqi në këtë moment, të cilat i nxisin qytetarët të diskreditojnë politikën dhe të vënë në dyshim integritetin e institucioneve.
QatarGate, skandali i përgjimeve dhe shkëmbimi i akuzave mes palëve nuk janë çështje të ndërlidhura. Megjithatë, ata nxisin një atmosferë toksike.
Njerëzit nuk dinë se çfarë, apo në çfarë, të besojnë.
Kjo është e dukshme në sondazhet publike mes të rinjve të Greqisë. Përveç klisheve për “rininë e zemëruar”, sondazhet nxjerrin një lloj indinjate të justifikuar.
Skandali i korrupsionit në Bruksel ka kënaqur dhe forcuar armiqtë e Perëndimit, të Evropës dhe të demokracisë.
Projekti i integrimit evropian nuk e ka fituar kurrë besimin e njerëzve; as nuk ka qenë shumë popullor. Përkundrazi, qytetari mesatar evropian e ka parë atë si një projekt elitar.
Tani është e sigurt që do të thellojë zhgënjimin dhe do të reduktojë pjesëmarrjen e njerëzve në punët publike të Unionit. Por kjo është më e pakta.
Gjëja më e keqe është njerëz si kryeministri i Hungarisë Viktor Orban dhe liderët e regjimeve autoritare që gjejnë mundësinë të hapin gojën dhe të thonë: “A është kjo demokracia, vlerat që dëshironit?”
Jemi në një udhëkryq. Demokracitë perëndimore po testohen.
Ata i kanë rezistuar ish-presidentit amerikan Donald Trump dhe krizës ekonomike, por po vihen në pikëpyetje.
Frika është e dukshme.
Forcat politike që urrejnë demokracinë dhe vlerat perëndimore do të forcohen ndjeshëm.
Ky rrezik duhet të na shqetësojë edhe ne në Greqi. Kushdo që nuk jeton në një flluskë, ndjen rrezikun, sheh rrezikun e një përsëritjeje të vitit 2012, kur sistemi politik u trondit në themelet e tij pa e vënë re askush më parë.
Nuk ka zgjidhje të lehta.
Është e qartë se mbyllja e hendekut midis të pasurve dhe atyre që nuk kanë është jetike. Pabarazitë nuk mund të tolerohen.
Por po aq e rëndësishme është që klasa në pushtet, në Greqi dhe në Bashkimin Evropian, të respektojë rregullat dhe parimet bazë.
Sepse asgjë nuk i forcon forcat antisistematike sesa sistemi aktual, kur ai kalbet.
Burimi: Gazeta greke Kathimerini
Përktheu dhe përshtati: Konica.al
