Lionel Messi po zhvillon padyshim Kupën e Botës më të mirë në të gjithë karrierën e tij, duke shënuar tre gola, deri më tani, duke përfshirë një në fitoren e Argjentinës ndaj Australisë për të arritur në çerekfinale në Katar 2022.
Messi, 35 vjeç, nuk kishte shënuar kurrë në fazën eliminatore të turneut më të madh të sportit gjatë katër pjesëmarrjeve të mëparshme. Messi, i cili u emërua MVP i ndeshjes të shtunën, foli se si ndihet mirënjohës për mbështetjen e tifozëve të Argjentinës.
“Këto janë ndjesi të jashtëzakonshme dhe ne duam t’i ndajmë këto momente me ta. Ne e dimë se ata bënë shumë përpjekje për të qenë këtu dhe kujtojmë edhe ata që janë në Argjentinë. Ky bashkim që kemi është diçka shumë e bukur dhe kjo duhet të jetë kombëtarja.
Ne donim të mblidheshim sërish me njerëzit tanë sepse është e pabesueshme se si e jetojnë dhe si na e transmetojnë atë gëzim. Ne i falënderojmë për këtë” – u shpreh Messi.
Messi tani ka 789 gola në 1000 ndeshje në karrierë dhe po duket më mirë se kurrë. Ai foli se si djemtë e tij të vegjël tashmë janë mjaft të rritur për të kuptuar rëndësinë e një Kupe Bote, gjë që mund të shpjegojë pse Messi ka qenë shumë i motivuar.
“Familja ime është gjithmonë në mendjen time. Fëmijët e mi, sepse janë të rritur dhe kuptojnë gjithçka, e vuajnë, e shijojnë… Jam shumë i lumtur që i ndaj këto momente me ta. Është Botërori im i parë me fëmijët e mi që janë rritur dhe kuptojnë gjithçka.
Për fëmijët e mi më të vegjël është Botërori i parë dhe është gjithmonë më i lumturi. Thiago, i cili është më i madhi, nuk ishte ende i vetëdijshëm se çfarë është Kupa e Botës” – përfundoi Messi.
VAZHDO TË LEXOSH MË TEPËR PËR TEMËN
Messi kalon Maradonën, Argjentina në çerekfinale
