Xheni Agolli emërohet në krye të Kadastrës së Durrësit. Drejtoresha e re është emëruar pas dorëheqjes së parevokueshme të numrit dy të ASHK-së nga pozicioni i drejtueses së komanduar në drejtorinë e Durrësit, ndaj në drejtimin e institucionit është vendosur Xheni Agolli, juriste në profesion.
Ndërkohë është mësuar dhe arsyeja e dorëheqjes së Risena Xhajës nga drejtimi i Kadastrës së Durrësit. Duket se për shkak të mbingarkesës dhe fluksit të punës në Kadastër, ajo pretendon se e kishin cunguar në kryerjen e detyrës së saj si nëndrejtoreshë e përgjithshme dhe drejtoreshë e Drejtorisë së Apelimit dhe bashkëqeverisjes në ASHK.
Në dorëheqjen e saj, Xhaja ka renditur dhe problematikat me të cilat është përballur ASHK në Durrës që nga viti 2019 e në vazhdim, periudhë kur kadastra dhe hipoteka u bashkuan në një agjenci të vetme. Të gjitha këto problematika e detyruan që të jepte dorëheqjen, e sot në vendin e saj u vendos Xheni Agolli.
