Mediat greke i kanë kushtuar një reportazh rrjetit të trafikantëve të drogës të cilët përdorin shtetas të pastrehë për të transportuar lëndën narkotike nga kufiri greko-shqiptar drejt Athinës.
Më 11 mars, efektivët e policisë së Igumenicës arrestuan një person i cili po transportonte një sasi prej 66.9 kg kanabis me makinë. Lënda narkotike ishte e ndarë në 45 pako.
Personi i arrestuar ka deklaruar në polici se nuk ka lidhje me rrjetin e trafikantëve. Ai ka deklaruar se është i pastrehë dhe se një person i kishte ofruar një shumë prej 2000 eurosh për të transportuar disa “produkte”.
“Unë jam i pastrehë. Unë fle në sheshin në Kato Patisia me të pastrehë të tjerë”, tha në polici drejtuesi i makinës, një 51-vjeçar grek. “Të martën e kaluar m’u afrua një i panjohur, i cili u prezantua si “Jani”. Siç kuptova nga theksi i tij, ai ishte shqiptar. Më pyeti nëse isha i interesuar për një punë. Sigurisht i thashë që isha i interesuar”.
Kjo nuk është hera e parë që policia dëgjonte një histori të tillë. Rrjeti që transporton marijuanën nga kufiri greko-shqiptar për në Athinë rekruton njerëz të pastrehë.
Shoferi në Igumenicë vazhdoi: “Më tha se do të më jepte 2000 euro nëse do të transportoja disa gjëra në emër të tij. E pyeta se çfarë gjërash dhe më tha se e kuptoja se për çfarë bëhej fjalë. Sot në mëngjes (11 mars) ai mbërriti tek sheshi ku fle me makinën që më kapët. Ai më dha para për shpenzimet e rrugës, gazin dhe benzinën dhe çelësat e makinës. Ai më tha se do të më jepte pjesën tjetër të parave kur të kthehesha me ‘gjërat’ në Athinë”.
Policia konstatoi se makina i përkiste një 81-vjeçari, banues në Athinë, per të cilin nisi kërkimin. Herët pasdite, ai u paraqit në një stacion policie në Athinën perëndimore për të denoncuar vjedhjen e automjetit dhe u arrestua. Ai tha se ia kishte dhënë makinën për disa orë një shqiptari që e njihte muajt e fundit, por pranoi se dinte pak për të.
“Njerëz të organizuar të trafikut të drogës përdorën klientin tim, i cili ndodh të jetë përdorues kronik i kanabisit”, tha për median “Magazine” avokati i 81-vjeçarit, Kostas Dimopoulos. “Akuza e bashkëpunimit moral në veprën e rastit të trafikut të lëndëve narkotike është dobësuar nga vetë provat e sjella gjatë procesit hetimor, por edhe nga faktet objektive, si rezultat i të cilave ai u la i lirë”, shtoi ai.
Një oficer policie në zonën e Epirit me një shërbim të gjatë në Sektorin e Narkotikëve tha për “Magazine” se nuk ishte hera e parë që dëgjonte një histori të ngjashme.
“Rrjeti që fiton miliona nga tregtia e kanabisit në kufirin greko-shqiptar, ndonjëherë zgjedh të pastrehët për transport. Këta njerëz kanë shumë nevojë dhe rrjeti i përdor. Në rastin më të keq, pra arrestimi i tyre, rrjeti kupton se thjesht do të humbasë një ngarkesë droge”.
I njëjti punonjës policie kujtoi një rast jashtë Janinës.
“Ne kishim ndalur një makinë pak pas doganës së Kakavijës. Ajo ishte e ngarkuar me më shumë se 100 kilogramë kanabis, por elementi i veçantë ishte shoferi. Na tha menjëherë se ishte i pastrehë, në fakt jetonte në makinë, në të cilën përveç drogës kishte edhe batanije, bidona gazi dhe pako me sheqer”. I njëjti person tha se ishte paguar 1500 euro për të transportuar kanabisin nga kufiri greko-shqiptar në Athinë, me rrezikun më të vogël të mundshëm për anëtarët e rangut të lartë të rrjetit.
Njerëzit në kufi shpjegojnë se pjesa më e madhe e drogës së kapur në Igumenicë, çuditërisht, nuk kalon nga porti, por arrin në Greqi në një mënyrë më pak të njohur: Nga e ashtuquajtura “zona e kuqe” e Sajadhës. Është një brez i territorit grek në fund të Thesprotisë, pak në veri të Igumenicës, i cili shtrihet për disa kilometra drejt Shqipërisë.
VAZHDO TË LEXOSH MË TEPËR PËR TEMËN
BBC për emigrantët: Qytetet rreth Tiranës janë zbrazur. Mundësia ekonomike, shtytësi kryesor. Korrupsioni…
“Po harxhojmë 6.8 milionë paund në ditë për hotele, për shqiptarët”
“Të gjithë duam të ikim nga varfëria”
