Turqia ka miratuar më në fund kërkesën e Finlandës për t’u bashkuar me NATO-n, duke i dhënë fund vonesave disamujore. Megjithatë, vendi është duke vazhduar gjithashtu të bllokojë Suedinë nga anëtarësimi në aleancën ushtarake.
Parlamenti turk votoi unanimisht në favor të anëtarësimit të Finlandës të enjten, duke pastruar pengesën e fundit në procesin e pranimit.
Votimi përmbush “premtimin” e presidentit turk Rexhep Tajip Erdogan për të lejuar Finlandën në aleancën e mbrojtjes. Turqia ishte anëtari i fundit i NATO-s që miratoi pranimin e Finlandës, megjithëse Hungaria e bëri këtë vetëm të hënën.
Finlanda dhe Suedia ishin përkushtuar për dekada për mos-angazhim me NATO-n si një mënyrë për të shmangur provokimin e Moskës. Por, kjo ndryshoi kur presidenti rus Vladimir Putin urdhëroi trupat e tij në Ukrainë dhe i detyroi dy vendet skandinave të rivlerësonin statusin e tyre neutral.
Një shumicë dërrmuese e anëtarëve të NATO-s i mirëpritën aplikimet e tyre, duke i miratuar ato brenda javësh. Por dy vende – Turqia dhe Hungaria – filluan ta pengojnë procesin.
NATO ka një politikë të dyerve të hapura, që do të thotë se çdo vend mund të ftohet për t’u anëtarësuar nëse shpreh një interes, për sa kohë që është në gjendje dhe dëshiron të mbajë parimet e traktatit themelues të bllokut. Megjithatë, sipas rregullave të pranimit, çdo shtet anëtar mund të vërë veton ndaj një vendi të ri për t’u anëtarësuar.
Erdogan akuzoi Finlandën dhe Suedinë për strehimin e “organizatave terroriste” kurde, ndërsa kryeministri hungarez Viktor Orban pretendoi se ata po përhapnin “gënjeshtra të plota” në lidhje me të dhënat e shtetit të tij.
Turqia dhe Hungaria e zbutën më vonë qëndrimin e tyre ndaj pranimit të Finlandës, duke hapur derën për anëtarësimin e saj në fillim të këtij muaji. Por, ata mbeten kundër anëtarësimit të Suedisë – të paktën tani për tani.
VAZHDO TË LEXOSH MË TEPËR PËR TEMËN
