James Cameron, regjisor i Hollivudit dhe eksplorues i njohur i oqeaneve, është shprehur se ai dhe ekspertë të tjerë të fushës kishin ngritur shqetësime për sigurinë e nëndetëses turistike OceanGate, para se ajo të ndërmerrte udhëtimin e radhës drejt Titanikut.
Cameron tha se komuniteti i zhytjeve në thellësi kishte ngritur më parë shqetësime për nëndetësen e OceanGate, dhe madje i kishte shkruar kompanisë duke thënë, sipas fjalëve të tij, “ju po shkoni në një rrugë drejt katastrofës”.
Ai e krahasoi tragjedinë e Titanit me humbjen e vetë Titanikut dhe ekuipazhit të tij në vitin 1912, duke e quajtur atë një “ironi të tmerrshme”.
“Tani kemi një tjetër rrënim që bazohet për fat të keq në të njëjtat parime të mosdëgjimit të paralajmërimeve,” tha ai. “OceanGate ishin paralajmëruar.”
James Cameron i ka thënë BBC se ai e kishte ndjerë “në kockat e tij” se nëndetësja kishte humbur, menjëherë sapo u dhanë sinjalet e para se ajo kishte dalë nga radarët. “Ju nuk mund të humbni komunikimet dhe navigimin së bashku pa një ngjarje ekstreme katastrofike”, thotë ai.
“Menjëherë mora në telefon disa nga kontaktet e mia në komunitetin e zhytësve të thellësisë. Brenda rreth një ore pata faktet e mëposhtme. Ata ishin në zbritje. Ata ishin në 3500 metra, duke shkuar për në fund në 3800 metra,” tha ai.
Çfarë ndodhi me nëndetësen e OceanGate?
Një ekuipazh prej pesë personash në një nëndetëse të quajtur Titan, në pronësi të OceanGate Expeditions, u zhyt për një ekspeditë në vendin e rrënojave të Titanikut të dielën në mëngjes dhe ekuipazhi i anijes kërkimore Polar Prince humbi kontaktin me nëndetësen rreth një orë e 45 minuta më vonë, tha roja bregdetare amerikane.
Roja bregdetare paralajmëroi fillimisht marinarët për nëndetëse të humbur të dielën mbrëma, duke thënë se një “nëndetëse 21 feet” me një byk të bardhë ishte vonuar për të dhënë pozicionin e saj të fundit. “ANIJEVE NË AFËRSI KËRKOHEN TË MBAJNË VËZHGIM TË SHPEJTË, TË NDIHMOJNË NËSE MUNDET”, thuhej në mesazhin e alarmit.
Nëndetësja humbi në një zonë rreth 900 milje në lindje të Cape Cod, në Atlantikun e Veriut, në ujë me një thellësi prej rreth 13,000 feet, që është pothuajse e barabartë me thellësinë e rrënojave të Titanikut.
Cilët ishin personat në bord?
Pesë personat në bord përfshinin një operator — i identifikuar më vonë si Stockton Rush, CEO i OceanGate Expeditions — dhe katër specialistë të misionit, një term që kompania përdor për pasagjerët e saj, të cilët paguanin deri në 250,000 dollarë për një vend.
Një zyrtar i marinës amerikane tha se Marina kishte zbuluar “një anomali akustike të ngjashme me një shpërthim” menjëherë pasi nëndetësja humbi kontaktin me sipërfaqen të dielën, raportoi korrespondenti i sigurisë kombëtare të CBS Neës, David Martin. Informacioni iu transmetua rojes bregdetare, e cila e përdori atë për të ngushtuar rrezen e zonës së kërkimit.
CBS News konfirmoi se pesë personat në bordin e zhytësit ishin Hamish Harding, një miliarder britanik 59-vjeçar, pronar biznesi dhe eksplorues; Biznesmeni britaniko-pakistanez Shahzada Dawood dhe djali i tij, Suleman; Eksploruesi francez Paul-Henri Nargeolet, i cili kishte bërë zhytje të shumta gjatë viteve për të eksploruar Titanikun; dhe Stockton Rush, CEO i OceanGate Expeditions, i cili po shërbente si pilot.
