Një shumë prej rreth 100 mijë eurosh është gjetur brenda 8 paketimeve në pjesën e tavanit të një autobusi në portin e Durrësit.
Autobusi ishte i linjës Bari-Durrës dhe në hyrje të Republikës së Shqipërisë është kaluar në vijën e dytë, për kontroll më të detajuar.
Gjatë kontrollit në pjesën e tavanit, janë gjetur 8 paketime me kartëmonedha në euro.
Shuma totale ishte 99.700 euro, të cilat u sekuestruan në cilësinë e provës materiale.
Ndërkohë është arrestuar shoferi i autobusit 37 vjeçari me iniciale E. Rr., banues në Durrës, për veprën penale “Mosdeklarimi në kufi i të hollave dhe i sendeve me vlerë”.
Njoftimi i policisë:
Vijojnë goditjet e njëpasnjëshme kundër paligjshmërisë dhe krimeve ndërkufitare.
Finalizohet operacioni policor i koduar “Entry”, bazuar në informacionet e siguruara nga inteligjenca policore, për mosdeklarim të të hollave në kufi.
Kishte fshehur një shumë të madhe parash (euro) në tavanin e autobusit të linjës Bari-Durrës, me qëllim që të mos i deklaronte në hyrje të RSh-së, arrestohet në flagrancë 37-vjeçari (drejtuesi i autobusit).
Sekuestrohen 99 700 euro të ndara në 8 paketime.
Shërbimet e Policisë Kufitare në port Durrës, në vijim të operacioneve të njëpasnjëshme të zhvilluara për goditjen e paligjshmërive dhe krimeve ndërkufitare, si rezultat i kontrolleve të shtuara, bazuar në analizën e riskut dhe në informacionet e siguruara nga inteligjenca informative, në bashkëpunim me Seksionin për Hetimin e Krimeve Ekonomiko-Financiare të DVP Durrës dhe autoritetet doganore, kanë organizuar dhe finalizuar operacionin policor të koduar “Entry”.
Gjatë operacionit, në hyrje të Republikës së Shqipërisë, është kaluar në vijën e dytë, për kontroll më të detajuar, një autobus tip “Scania” i linjës Durrës-Bari-Durrës. Gjatë kontrollit të imtësishëm në autobus, me metoda bashkëkohore, në pjesën e tavanit, janë gjetur 8 paketime me kartëmonedha në euro, gjithësej 99 700 euro, të cilat u sekuestruan në cilësinë e provës materiale.
Në vijim të veprimeve të para hetimore të kryera nga specialistët për Hetimin e Krimeve Ekonomike dhe Financiare të Drejtorisë Vendore të Policisë Durrës, u bë arrestimi në flagrancë i shtetasit E. Rr., 37 vjeç, banues në Durrës, për veprën penale “Mosdeklarimi në kufi i të hollave dhe i sendeve me vlerë”.
Vijon puna hetimore për dokumentimin e plotë të këtij rasti.
Materialet procedurale i kaluan Prokurorisë, për veprime të mëtejshme.
VAZHDO TË LEXOSH MË TEPËR PËR TEMËN
Dëshmitë e skafistëve të penduar
Detaje nga operacioni i Policisë në Portin e Durrësit
