Vrasjet e mirëplanifikuara, dronët mbi Moskë, sabotimi i linjave të energjisë dhe furnizimit: të gjitha këto janë episode që kanë nxitur shumë spekulime mbi ecurinë e luftës në Ukrainë. Me këto veprime, konflikti de facto është futur edhe në territorin rus, por deri më sot ka qenë pothuajse e pamundur të gjendet “autori”. Shumë detaje dhe të dhëna të çojnë tek Ukraina. Siç shkruan CNN, që nga fillimi i luftës, shërbimet e inteligjencës së Kievit kishin arritur të krijonin një rrjet sabotatorësh që vepronin nga Moska dhe qytete të tjera të federatës. E gjitha kjo, ishte pjesë e një strategjie të mirëpërcaktuar, që synon destabilizimin e kuadrit politik rus dhe detyrimin e mbrojtjes ruse që të shpërqendrojë njerëzit dhe pajisjet nga territoret e pushtuara.
“Qelizat” pro-Kievit
Raporti i CNN u frymëzua nga zbulimet e zyrtarëve të inteligjencës amerikane dhenga dokumentet e vjedhura nga Mbrojtja si pjesë e skandalit të zbulimit të Pentagonit. Zyrtarët zbuluan se qelizat po operojnë në Rusi me urdhër të Kievit dhe janë pjesë e inteligjencës së Kievit. Këta janë shtetas rusë dashamirës për kauzën ukrainase ose kundër lëvizjeve të fundit të Kremlinit. Por mund të ketë edhe anëtarë të shërbimit sekret ukrainas të infiltruar.Celulat që vepronin nga territori rus merrnin udhëzime se kur, ku dhe si të godisnin. Sipas CNN, Kievi e zhvilloi këtë rrjet pas disa muajsh pune intensive dhe trajnimi të anëtarëve të grupeve pro-ukrainase. Vendimi për të vepruar drejtpërdrejt në territorin rus u mor në qarqet e shërbimeve të inteligjencës ukrainase, por edhe me “miratimin” e qeverisë dhe autoriteteve politike. Raporti citonte një pjesë nga një prej dokumenteve të vjedhura nga Pentagoni, sipas të cilit presidenti ukrainas Volodymyr Zelensky sugjeroi në fund të shkurtit të godisnin rajonin e Rostovit dhe, në veçanti, vendet e takimit të trupave ruse, dhe më pas do të fokusoheshin në Ukrainën jugore. Sot rrjeti i simpatizantëve pro-Kievit në Rusi duket shumë më i gjerë: me diversantë “të thjeshtë”, për të vënë në shënjestër infrastrukturat individuale, si dhe luftëtarë të trajnuar për përdorimin e dronëve.
Roli i korrupsionit
Por, si Kievi ka arritur të trajnojë, financojë dhe armatosë njëkohësisht “qelizat” që ka në dispozicion? Përgjigja mund të jetë korrupsioni. Siç shkruan CNN, dy zyrtarë evropianë thanë: “Paratë cash mund të bëjnë mrekulli. Sidomos në zonat ku mbijetesa perceptohet si problem i të gjithëve”, si për shembull provincat ruse në kufi me Ukrainën.Kievi e ka shfrytëzuar këtë dobësi në Moskë, duke korruptuar rojet kufitare dhe zyrtarë të tjerë të sigurisë. Në këtë mënyrë, inteligjenca ukrainase arriti të kalonte përtej kufirit paratë dhe materialet e destinuara për grupet pro-Kievit. Madje, edhe mjetet për të ndërtuar dhe montuar dronët, gjë që shpjegon sulmet e kryera muajin e fundit në Kremlin dhe në lagjet e banuara të Moskës.
Qëndrimi i Perëndimit
Aleatët e mëdhenj ukrainas duket se i miratojnë këto veprime përtej kufirit. Një përjashtim është ndoshta rasti i vrasjes së Daria Dugina-s, vajzës së politologut Aleksandër Dugin, që vdiq në gusht në një sulm ndaj Moskës që SHBA ia atribuoi Kievit. Pentagoni u duk “i zemëruar” ndaj shërbimeve ukrainase për shkak të dëmtimit të mundshëm të imazhit të tyre dhe pasojave të mundshme.Në përgjithësi, megjithatë, raporti i CNN zbuloi se SHBA i miraton veprimet e Kievit. Midis dokumenteve të vjedhura nga Pentagoni, për shembull, ekziston edhe një raport i CIA-s drejtuar Kyrylo Budanov, kreut të shërbimit sekret ushtarak ukrainas, ku zyrtarët amerikanë i bëjnë thirrje që të autorizojë veprime në territorin rus vetëm pas përvjetorit të parë të luftës.Nuk është rastësi që ditët e fundit edhe ministri i Jashtëm britanik, James Cleverly, ka justifikuar sulmet e Ukrainës nga pikëpamja ligjore.“Ukraina ka të drejtë të projektojë forcë përtej kufijve të saj për të minuar aftësinë e Rusisë për të projektuar forcë në vetë Ukrainën, objektivat legjitime ushtarake përtej kufijve të saj njihen ndërkombëtarisht si pjesë e vetëmbrojtjes së një kombi. Ne duhet ta pranojmë këtë”, tha ai.
