Rritja e qëndrueshme ekonomike në Francë dhe Spanjë dhe një rimëkëmbje shumë modeste në Gjermani mund të mjaftojnë për të konfirmuar se eurozona tashmë ka dalë nga një recesion që filloi në tremujorin e fundit të 2022.
Të dhënat zyrtare treguan se PBB-ja franceze u rrit me 0.5% në periudhën prill-qershor, krahasuar me tremujorin e parë të 2023, e nxitur nga një ecuri e fortë në tregtinë e jashtme.
“Eksportet u rikthyen këtë tremujor … si dhe importet në një masë më të vogël,” tha në një deklaratë zyra kombëtare franceze e statistikave.
Spanja raportoi rritje të PBB-së prej 0.4%, pak më e dobët se në tremujorin e parë.
Gjermania ngeci, por ky ishte një përmirësim në dy tremujorët e mëparshëm kur ekonomia më e madhe e Evropës u tkurr.
“Shpenzimet e konsumit final të familjeve u stabilizuan në tremujorin e dytë të 2023 pas gjashtëmujorit të dobët dimëror”, tha në një deklaratë zyra gjermane e statistikave.
Shifrat e PBB-së për tremujorin e dytë për zonën e euros në tërësi do të publikohen të hënën.
“Ne presim një zgjerim modest të PBB-së së eurozonës pas dy tremujorësh të dobët”, tha Oxford Economics në një shënim kërkimor të premten. “Të dhënat kombëtare të publikuara deri më tani tregojnë për një surprizë të vogël të mundshme, veçanërisht falë rritjes çuditërisht të fortë në Francë.”
Por edhe nëse konfirmojnë se rajoni po rritet sërish, pas dy tremujorësh tkurrje radhazi, të dhënat e fundit të sondazhit sugjerojnë se një përshpejtim i dukshëm i aktivitetit ekonomik nuk ka gjasa, pavarësisht lehtësimit të presioneve inflacioniste dhe mundësisë që normat e interesit tani të jenë pranë kulmit të tyre.
Një sondazh i parashikuesve profesionistë të publikuar nga Banka Qendrore Evropiane të premten tregoi se pritjet për rritjen e PBB-së së eurozonës këtë vit ishin të pandryshuara në 0.6%, krahasuar me tre muaj më parë, ndërsa parashikimet për vitin 2024 ishin shkurtuar lehtë në 1.1%.
Ulja e inflacionit dhe rritja e pagave po mbështesnin konsumin, por normat më të larta të interesit dhe pasiguria për rritje të mëtejshme të normave po ngadalësonin investimet.
“Kjo u pa si e shoqëruar nga një ngadalësim për shkak të sektorit të dobët të prodhimit, me erëra të kundërta nga rimëkëmbja më e ngadaltë se sa pritej në Kinë. Megjithatë, të anketuarit e konsideruan elasticitetin e sektorit të shërbimeve si pjesërisht kundër kësaj dobësie dhe kështu ruajtën gjerësisht pritjet e tyre të mëparshme për rritjen reale të PBB-së në vitin 2023,” tha BQE.
Vetëm 7% e parashikuesve presin që zona e euros të pësojë një recesion tjetër, ose dy tremujorë radhazi tkurrje, nga tani deri në tremujorin e parë të 2024.
BQE rriti të enjten normat e interesit në zonën e euros në 3.75%, duke përputhur normën më të lartë që nga lansimi i monedhës euro në 1999, ndërsa ajo vazhdon të ulë inflacionin. Por i mbajti investitorët të hamendësonin nëse do të ndalonte, apo do të rritet sërish, në takimin e radhës.
“Ne kemi një mendje të hapur se cilat do të jenë vendimet në shtator dhe në takimet pasuese,” u tha gazetarëve presidentja e BQE Christine Lagarde, duke shtuar “ne mund të rritim normën e interesit [ose] mund të mos e ndryshojmë”.
Megjithatë, uljet e normave nuk janë në tryezë. “Kjo është një jo e sigurt,” tha Lagarde.
Kërkesa për kredi biznesi ra në një nivel të ulët rekord në tremujorin e dytë, sipas një sondazhi të publikuar nga BQE të martën. Raporti zbuloi gjithashtu se bankat kishin shtrënguar më tej standardet e kredisë në të gjitha kategoritë e kredive.
Më vete, të dhënat e sondazhit të publikuara të hënën treguan se aktiviteti i biznesit në eurozonë u tkurr me ritmin më të shpejtë në tetë muaj në korrik.
Një lexim fillestar i Indeksit të Menaxherëve të Blerjeve, i cili ndjek aktivitetin në sektorët e prodhimit dhe shërbimeve, ra në 48.9 nga 49.9 në qershor. Një lexim nën 50 tregon një tkurrje.
/Përkthyer dhe përshtatur për Konica.al nga “CNN“
VAZHDO TË LEXOSH MË TEPËR PËR TEMËN
Europa hap “thesin”, miliarda euro mbështetje për qytetarët
FMN: Më e keqja do të vijë, recesioni nuk do t’i prekë të gjithë
“Sfidat në 2023, më të ashpra se ato të vitit të kaluar”
