Kryesuesi i Komitetit për Punë të Jashtme në Parlamentin e Gjermanisë (Bundestag), Michael Roth teksa ka komentuar shqetësimin e SHBA për vendosjen e trupave ushtarake serbe pranë kufirit me Kosovën, ka kritikuar presidentin e Serbisë, Aleksandër Vuçiç, për situatën e krijuar në terren.
“I nderuari zoti President Vuçiç pyes veten nëse ky është kontributi juaj për de-përshkallëzimin, paqen dhe pajtimin?”, ka pyetur ai në një postim në platformën sociale, X.
Në këtë situatë të tensionuar në veri, deputeti gjerman ka kritikuar edhe mos-reagimin e Bashkimit Evropian.
“Ku dreqin është BE”, ka shtuar ai.
Pas Shteteve të Bashkuara të Amerikës edhe përfaqësuesi i lartë i Bashkimit Evropian për Politikë të Jashtme dhe Siguri, Josep Borrell, i ka bërë thirrje Serbisë ta ndalë menjëherë zhvendosjen e ushtrisë përgjatë kufirit me Kosovën dhe t’i tërheqë trupat e vendosur deri tani.
Shefi i diplomacisë së BE-së tha për disa media ndërkombëtare se blloku është duke diskutuar me partnerët dhe aleatët e vet për gjendjen e tanishme Veri të Kosovës, ku sasia e armatimit të gjetur nga Policia e Kosovës “është shumë serioze”.
Borell ka përsëritur pritjet e tij që përgjegjësit për sulmin e 24 shtatorit të ndëshkohen dhe Kosova dhe Serbia t’i kthehen dialogut.
“Duhet të kthehemi prapa në situatën në të cilën palët bisedojnë dhe të kthehemi në dialogun e lehtësuar nga BE-ja i cili është e vetmja platformë për normalizimin e raporteve mes tyre”, tha Borrell.
