Ashtu siç ishte paralajmëruar, moti i keq ka “paralizuar” Ukrainën.
Por jo vetëm, edhe Rusia ka hasur vështirësi.
Një stuhi dëbore, me erëra deri në 144 kilometra në orë, goditi Krimenë, duke lënë pothuajse gjysmë milioni banorë pa energji elektrike (2 milionë me Rusinë jugore).
Vetëm në Sevastopol, një stuhi rrëzoi 189 pemë dhe dëmtoi çatitë e 42 ndërtesave.
Në pjesën tjetër të vendit, moti i keq shkaktoi ndërprerje të energjisë elektrike në më shumë se 2,000 vende në 16 rajone dhe bllokoi trafikun rrugor dhe hekurudhor.
Bora dhe balta i kanë lënë dy ushtritë në një ngërç, edhe nëse forcat ruse kanë bërë përparim javën e fundit në frontin Avdiivka, vetëm dhjetë kilometra nga Donetsk.
Ushtria ukrainase u detyrua të tërhiqej nga zonat në jug-lindje të qytetit industrial dhe gjithashtu në veri-perëndim.
Tani Kievi ka një korridor të ngushtë rreth 7 kilometra për transferimin e furnizimeve në garnizone.
E gjithë kjo ndërkohë që sistemet e mbrojtjes ajrore të Moskës rrëzuan 2 raketa S-200 që ishin gati të goditnin objektivat në pjesën jugore të Detit Azov.
Ukrainasit arritën të hidhnin në erë një makinë në Melitopol në të cilën ndodheshin disa luftëtarë çeçenë. Në ditën e 642 të luftimeve, ukrainasit zmbrapsën 71 sulme të armikut në bregun e majtë të lumit Dnipro, në rajonin Kherson.
Me dronë ata shkatërruan një depo municioni në tokën ruse në Volgograd.
“Avionët pa pilot do të jenë protagonistë gjatë gjithë dimrit në të dy frontet, më shumë se raketat, tani që në tokë është vështirë të manovrohet”, është i bindur zëdhënësi i Forcave Ajrore të Kievit, Ignat.
Dy civilë u vranë dhe katër u plagosën nga një bombardim ukrainas në Pollogi (Zaporizhzhia).
