Ish-kryeministri Sali Berisha ka folur për mediat pas mbledhjes së grupit parlamentar, ku tha se diskutimet me deputetët ishin të gjera, por nuk dha detaje duke bërë me dije se do të jetë Gazment Bardhi ai që do të njohë publikun me hollësitë.
Ai tha se të enjten, ditën që votohet në Kuvend kërkesa e SPAK për heqjen e imunitetit të tij, e gjithë Shqopëria do të jetë para Parlamentit.
“Diskutimet ishin të gjera, të shumta, zoti Bardhi do t’u njohë më me hollësi për vendimet dhe parimet që do të bazohet vendimi ynë. Të enjten Shqipëria është para parlamentit. Pas të enjten vijon beteja pa kthim”, tha Berisha.
PRONONCIMI I PLOTË
Ne do të mbrojmë vlerat, parimet, opozitën nga një sulm aprincipial antikushtetues, brutal i Edi Ramës dhe lakejve të tij. U diskutua gjerësisht mbi qendrimet që do të mbahen ndaj këtij regjimi dhe ju garantoj se do të jenë vetëm përballje, përballje.
Nuk ka asnjë shans që Edi Rama të konsolidojë këtë regjim antidemokratik, diktatorial, të bazuar në krimin, drogën dhe vjedhjen e shqiptarëve.
Diskutimet ishin të gjera, të shumta.
Zoti Bardhi do të ju njohë ju me më hollësi për vendimet që u morën, parimet që do të bazohet qendrimi ynë.
Pyetje: Z.Berisha, o sot o kurrë, por deputetët që mbështesin Gazment Bardhi dhe ai vetë nuk ishin në protestën tuaj.
Sali Berisha: A jemi sot apo dje?
Pyetje: A i mbështesin ata protestat?
Sali Berisha: Ditën e enjte Shqipëria është para parlamentit. Të bashkuar absolutisht. Ditën e enjte është para parlamentit, Tirana dhe Shqipëria.
Pyetje: Pas ditës së enjte çfarë do të ndodhë?
Sali Berisha: Betejë pa kthim, betejë pa kthim. Mirupafshim!
