Presidentja e Kosovës, Vjosa Osmani ka folur për ndryshimin “për të mirë” në raportet me kryeministrin shqiptar, Edi Rama.
Osmani ka thënë se pavarësisht dallimeve në disa çështje, është shumë me rëndësi që shqiptarët të unifikojnë politikën e tyre të jashtme.
Kryetarja e shtetit të Kosovës ka thënë se Shqipëria është zëri i Kosovës.
Sipas Osmanit, aty ku shteti ynë nuk ka përfaqësim, është Shqipëria, prandaj shteti shqiptar duhet konsideruar jo vetëm shtet simotër, por edhe aleat të fuqishëm në përballje me sfidat përpara.
“Me qëllim të shtyrjes përpara të prioriteteve tona, është shumë me rëndësi që shqiptarët në rajon të unifikojnë politikën e jashtme. Shqipëria është zëri ynë atje ku nuk kemi përfaqësim, ndaj pavarësisht dallimeve që kemi pasur në disa çështje, ne duhet të vazhdojmë të koordinohemi dhe ta konsiderojmë shtetin shqiptar jo vetëm shtet simotër, por aleat strategjik të fuqishëm në përballje me sfidat që i kemi përpara. Kosova duhet të vlerësojë e të fuqizojë më shumë se çdo herë tjetër aleancat e saj. Bashkëpunimi e bashkërendimi me ata që na qëndruan pranë në momentet më të rënda të historisë sonë është veprim në shërbim të shtetit. Shteti ynë i ka themelet e forta sepse qëndron mbi sakrificën e popullit tonë, por edhe mbi partneritetet që i kemi ndërtuar. Prandaj, bashkëpunimi me Shqipërinë në fuqizimin e shtetit të Kosovës është esencial”, ka thënë presidentja Osmani per Reporterin.
